काठमाडौं । काठमाडौंको सुन्दरीजलस्थित खोलामा बेपत्ता भएका १६ वर्षीय शुभमश्री प्रधान आइतबार मृतावस्थामा फेलापरेका छन् ।

खोलामा खसेर बेपत्ता भएको ठाउँनजिकै ढुंगाले च्यापिएको अवस्थामा शव फेलापरेको महानगरीय प्रहरी परिसर काठमाडौंका एसपी दिनेशराज मैनालीले जानकारी दिए ।

शनिबार सात साथीहरूको समूहमा घुम्न गएका उनी फोटो खिच्ने क्रममा खसेको सामान टिप्न खोज्दा चिप्लिएर बेपत्ता भएका थिए ।

त्यसपछि उनका साथीहरूले प्रहरीलाई खबर गरेका थिए । प्रहरीले शनिबार अबेर रातिसम्म खोज्दा पनि उनी भेटिएका थिएनन् ।

सिन्धुपाल्चोकका उनी काठमाडौंको कपनमा परिवारसँग बस्दै आएका थिए । महानगरी प्रहरी प्रभाग सुन्दरीजलका प्रहरी नायब निरीक्षक धीरेन्द्र थपलियाका अनुसार शुभम कपनस्थित एउटा स्कुलबाट एसईई दिएर नतिजाको पर्खाइमा थिए ।