काठमाडौं । झापामा तीन किशोरी एउटै रुखमा झुन्डिएको अवस्थामा आइतबार मृत फेलापरेका छन् ।

कचनकवल गाउँपालिका–५, बेल्लेगाउँस्थित सुनकोसी चिया बगानको जिङखोला किनारमा रहेको रुखमा झुन्डिएको अवस्थामा उनीहरू मृत फेलापरेका हुन् ।

मृत फेला पर्नेमा कचनकवल गाँउपालिका–५, दले गाउ बस्ने पुवालु गणेशकी १७ वर्षीया छोरी अञ्जली, सोही स्थान बस्ने पंचम गणेशकी १६ वर्षीया छोरी करिना र वीरबल गणेशकी १७ वर्षीया छोरी कल्पनाकुमारी छन् ।

प्रहरीका अनुसार उनीहरू शनिबार मध्याह्न करिब १२ बजे घुम्न जाने भन्दै घरपरिवारलाई जानकारी गराएर निस्किएका थिए । बेलुकासम्म नफर्किएपछि खोजीकार्य सुरु गरिएको थियो ।

खोजीकै क्रममा आज बिहान सुनकोसी चिया बगाननजिकै रहेको बयरको रुखको हाँगामा डोरीको पासो लागी झुन्डिरहेको अवस्थामा फेलापरेका हुन् ।

जिल्ला प्रहरी कार्यालय झापाका प्रवक्ता वसन्त पाठकले घटनाबारे अनुसन्धान जारी रहेको बताए । आत्महत्या हो वा अरू कारण भन्नेमा प्रहरी अनुसन्धानकेन्द्रित छ ।