रोम । इटालियन प्रधानमन्त्री मारिओ ड्राघीले पदबाट राजिनामा दिने विचार त्यागेका छन् । 

बरु उनले आफ्नो गठबन्धन सरकारलाई धराशायी हुनबाट जोगाउन एउटा नयाँ सम्झौताका लागि आह्वान गरेका छन् । 

छ दिन अघि राष्ट्रपतिले उनको राजीनामा पत्र अस्वीकार गरेका थिए । साथै ड्राघीले सरकार बचाउनका लागि थुप्रै इटालियन जनताले गरेको अनुरोधलाई बेवास्ता गर्न नसकिने पनि स्पष्ट पारेका छन् । 

उनले इटालीको सिनेटलाई भनेका छन्, “यदि हामी सबै साथमा रहने हो भने एउटा पूर्णतः नयाँ सम्झौताको आवश्यकता छ । हामीलाई एउटा ठोस र इमानदार सम्झौताको जरुरी छ, त्यसका लागि तयार छौँ ?”

युरोपेली केन्द्रीय बैंकका पूर्वअध्यक्ष ड्राघीले विगत अठार महिनादेखि संयुक्त सरकारको नेतृत्व गर्दै आएका छन् । 

अर्को वर्ष चुनावको सम्मुख उनलाई सरकारबाट बाहिरिनु थियो । तर, आफ्नो संयुक्त सरकारबाट पपुलिस्ट फाइभ स्टार मुभमेन्टले साथ छोडेपछि उनले गत बिहीबार नै राजिनामा दिने सोच बनाएका थिए । नीतिगत मतभेद आएपछि फाइभ स्टारले संसदमा विश्वासका लागि भएको मतदानबाट पछि हटेको थियो । 

यद्यपि ड्राघीको सरकार विश्वासको मत पाउन सफल भएको थियो । राष्ट्रपति सर्गियो म्यात्तारेल्लाले ७४ वर्षीय प्रधानमन्त्रीलाई यसै साता संसदलाई सम्बोधन गर्न अनुरोध गरेका छन् । 

बीबीसीबाट ।