काठमाडौं । चलचित्र ‘प्रसाद–२’ छायांकन नहुँदै रोकिएको छ । १७ दिन अगाडि कलाकारसहित सम्पूर्ण छायांकन युनिट पोखरा पुगे पनि चलचित्रको छायांकन सुरु भएको थिएन । 

पारिश्रमिक र चलचित्रको भिजुअल ल्याङवेजलाई लिएर असमजदारी भएपछि सिनेमाको छायांकन सुरु नहुँदै रोकिएको हो । चलचित्रका मुख्य कलाकार विपीन कार्कीले पटक–पटक सम्झौता अनुसार पारिश्रमिक माग गरे पनि निर्माण पक्षले उपलब्ध नगराएपछि उनी पछि हटेका हुन् । 

उनीसँग छायांकन सुरु हुनुभन्दा अगाडि नै सम्पूर्ण पारिश्रमिक उपलब्ध गराउने सम्झौता थियो । “तर, हिजो आएर सुभास थापा प्रोडक्सन कम्पनीसँगै अर्को कम्पनी पनि जोडिएर सिनेमा बनाउने भनियो । त्यसले बाँकी पारिश्रमिक उपलब्ध गराउने भनियो,” विपीनले भने, “तर, त्यो कम्पनी दर्ता नै भएको रहेनछ । दर्ता नभएको कम्पनीसँग कसरी काम गर्ने । पहिला कम्पनी दर्ता हुनुपर्यो । र, दुबै कम्पनीले संयुक्त रुपमा चलचित्र बनाउने निर्णय भएको कागजात हुनुपर्यो ।”

कागजी प्रक्रिया पूरा नभएसम्म सिनेमाको छायांकनमा आफू नजाने विपीन बताउँछन् । 
उनले आफ्नो बुवाको भूमिकामा रहेका लोकमणि सापकोटा विरामी भएको र उनको ठाउँमा अर्को कलाकार खोज्नु पर्ने वा निको हुन्जेल पर्खिनुको विकल्प नभएको पनि बताए । धेरै सिन सापकोटासँगै रहेकाले उनको अनुपस्थितिमा चलचित्र छाचयांकन हुन नसक्ने स्पष्ट पारे । 

विपीनले भिजुअल ल्याङवेज पनि स्पष्ट नभएको भन्दै असन्तुष्टि जनाए । “सिनेमाको भिजुअल ल्याङवेज के हो भनेर मैले निर्देशकसँग मागेँ । तर, उहाँले मलाई स्पष्ट जवाफ दिनसक्नु भएन । स्क्रिप्टमा डे र नाइट सिनसमेत छुट्टयाइएको छैन । मेरो लुक्स र क्यारेक्टर कस्तो देखिनेसम्म स्पष्ट छैन भने कसरी काम गर्न सकिन्छ ?” आफूमाथि रहेको दर्शकको भरोसा टुट्नेगरी काम नगर्ने पनि उनले स्पष्ट पारे ।

‘प्रसाद–२’ सुदर्शन थापाले निर्देशन गर्दैछन् ।