काठमाडौं । नायिका करिष्मा मानन्धरले सडकमा व्यापार गर्नेहरूलाई रोक्नेभन्दा पनि व्यवस्थापन गर्नेतर्फ लाग्नु पर्नेमा जोड दिएकी छन् । उनले काठमाडौंका फुटपाथमा व्यापार गर्न नदिने महानगरको निर्णयप्रति असन्तुष्टि जनाउँदै रोक्नेभन्दा पनि व्यवस्थापन गर्नुपर्नेमा जोड दिएकी हुन् ।
“के हामी गाउँ छोडेर गरिखान हाम्रो चोकमा नआऊ भन्न सक्छौँ ?,” उनले सामाजिक सञ्जाल फेसबुकमा लेखेकी छन्, “हरेक मानिस उत्कृष्ट जीवन बाँच्न चाहन्छ । उसको कोसिसलाई मार्गनिर्देशन गर्नु राज्यको जिम्मेवारी हो । सबै विदेश गएर गल्फको गर्मीमा काम गर्न नसक्ने पनि त छन् होला । के तिनले आफ्नो र आफ्ना छोराछोरीको मुहारमा खुसी भएको सपना देख्न नपाउने ?”
सहरमा आए काम गर्नु रहर नभएर वाद्यता भएको बुझ्नुपर्ने उनको भनाइ छ । “स्थानीय तहसम्म पुगेको सरकार छ । तर, किन नागरिकको मनमा सहरको मोह छ ?, स्वच्छ वातावरण भएको, हराभरा प्रकृति भएको, इज्जत भएको आफ्नो गाउँघरमा नबसेर किन ऊ यो कोचाकोचको जीवन जिउन वाद्य छ ?,” करिष्मा प्रश्न गर्छिन्, “गाउँपाखामा सबै सुविधा उपलब्ध भएको भए त्यही गाउँको डाक्टर, इन्जिनियर, टिचर, राजनीतिकर्मी सहर बसेर या विदेशमा बसेर काम गरिरहेको हुँदैन थियो होला ?”
