काठमाडौं । दुई विभागीय टोली नेपाल पुलिस क्लब र सशस्त्र प्रहरी बल (एपीएफ) क्लबले मंगलबार बागमती प्रदेश न्यू डायमन्ड कप खुला महिला राष्ट्रिय भलिबल प्रतियोगितामा विजय सुरुआत गरेका छन् ।

कीर्तिपुरस्थित बहुउद्देश्यीय कभर्डहलमा जारी प्रतियोगिताको पहिलो खेलमा नेपाल पुलिसले आयोजक न्यू डायमन्ड स्पोर्ट्स क्लबलाई ३-० को सोझो सेटमा हराएको हो । पुलिस क्लबले २५-१६, २५-१५, २५-१५ को स्कोरमा विजय हासिल गरेको हो । 

दोस्रो खेलमा एपीएफले पनि परोपकार आदर्श माध्यमिक विद्यालयलाई  ३-० को सोझो सेटमा हराएको हो । एपीएफले परोपकार आदर्श माविलाई २५-११, २५-४, २५-३ को स्कोरमा  हराएको हो । 

पाँच दिनसम्म चल्ने प्रतियोगितामा आयोजक न्यू डायमन्डसहित एपीएफ क्लब, पुलिस क्लब र परोपकार आदर्श मावि गरी चार टिमको सहभागिता छ । राउन्ड रोविन पद्धतिमा हुने प्रतियोगिताको शीर्ष दुई टोलीले उपाधिका लागि प्रतिस्पर्धा गर्नेछन् ।