काठमाडौं । नेपालकी फिफा रेफ्री अञ्जना राई एएफसी एलिट वुमन रेफ्री तथा सहायक रेफ्री प्यानल २०२२ मा समावेश भएकी छिन् । अञ्जनाले एएफसी महिला रेफ्री र सहायक रेफ्री कोर्स पूरा गरेपछि उक्त प्यानलमा पर्न सफल भएको अखिल नेपाल फुटबल संघ (एन्फा)ले जनाएको छ । 

अञ्जनालाई एएफसी एलिट वुमन रेफ्री तथा सहायक रेफ्री प्यानल २०२२ मा समावेश गरिएको एएफसीको पत्र एन्फाले शुक्रबार प्राप्त गरेको बताइएको छ । 

फिफा रेफ्री राईलाई एएफसी एलिट रेफ्री तयारी कोर्सका लागि आमन्त्रित गरिने एन्फाले जनाएको छ । उक्त कोर्स नोभेम्बरमा हुनेछ । राईले २०२१ मा फिफा रेफ्री ब्याच प्राप्त गरेकी थिइन् ।