अमेरिका । ह्वाइट हाउसका दक्षिण एसिया हेर्ने उच्च कर्मचारीले चीनको नेपाल नीतिप्रति कडा टिप्पणी गर्दै मिलेनियम च्यालेन्ज कर्पोरेशन (एमसीसी)को विरोधमा सडकमा भएका प्रर्दशन चीनकै उक्साहटमा भएको बताएका छन् । 

अमेरिकी सहायक विदेशमन्त्री (असिस्टेन्ट सेक्रेटरी) डोनाल्ड लुले भने, “तपाईँलाई थाहा नै छ बेइजिङ पहिलेदेखिनै एमसीसी प्रोजेक्टप्रति आक्रोशित थियो ।”

अमेरिकाको डलासमा नेपाली समुदायसँग बुधबार आयोजित एक अन्तरक्रियामा उनले यस्तो बताएका हुन् ।

एमसीसी सम्झौता गर्न हुँदैन भन्दै सडकमा विरोध भएका थिए । चीनप्रति प्रष्ट संकेत गर्दै लु ले भने, “तपाईँलाई थाहै छ कसले यो गर्न उकास्यो, उत्तरको ठूलो देशले ! किनकि  उ नेपालमा आफ्नो प्रभुत्व कायम गर्न चाहन्छ ।”

नेपाल र अमेरिकाबीचको सम्बन्धमा सरकारी तहमा कहिलेकाहिँ तलमाथि हुने गरेको भए पनि जनस्तरमा भने सधैं समधुर सम्बन्ध रहँदै आएको उनको टिप्पणी थियो ।

एमसीसी सम्झौता शुद्ध अनुदान भएको बताउँदै लुले भने, “सम्झौताको डकुमेन्टभन्दा हामी तलमाथि गर्दैनौँ त्यसमा अमेरिकाले छुट्टै व्याख्या गर्दैन ।  सम्झौतामा जे उल्लेख छ त्यहीअनुसार हुन्छ ।” 

नेपालमा संसदले गत फेब्रुअरीमा यो सम्झौता स्वीकृत गरेको थियो । यस क्रममा १२ बुँदे ब्याख्यात्मक टिप्पणी पनि संसदले स्वीकारेको थियो । 

अमेरिका सरकारका स्टेट डिपार्टमेन्टका वरिष्ठ अधिकारीले नेपाली समुदायसँग छलफल गरेको यो पहिलोपटक हो । 

उक्त अवसरमा लुले एमसीसी र एसपीपीबीच कुनै पनि तालमेल नरहेको समेत बताए ।

“एसपीपी नेपाली सेनाको मेडिकल सेवा, उचाईमा गरिने तालिम, उद्धार लागि हुने सहयोग मात्र हो,” लुले भने “एसपीपी दुई देशका सेनाबीचको आपसी सहयोग आदान प्रदान र उपहार मात्र हो एमसीसी र एसपीपी नितान्त फरक हुन् ।” 

लुले गत नोभेम्बर महिनामा नेपाल भ्रमण गरेका थिए । त्यस अवसरमा प्रधानमन्त्री शेरबहादुर देउवा, एमाले अध्यक्ष केपी शर्मा ओलीलगायत राजनीतिक पार्टीका वरिष्ठ नेतालाई भेट गरेको उनले बताए ।

माओवादी पार्टी अध्यक्ष पुष्पकमल दाहालसँग भएको भेटको उनले विशेष चर्चा गरे ।  नेपाली समुदायसँगको अन्तरक्रियाको सुरुमै उनले आफ्नो नेपाल सम्बन्धकाबारेमा जानकारी दिएका थिए ।

जनकपुरमा रिक्सा चढेको मात्र होइन शेर्पाको हिमाल आरोहणका बारेमासमेत आफुलाई जोडेको बताए ।

उक्त अवसरमा नेपाली समुदायसँग नेपाल–अमेरिकाबीच दोहोरो कर उन्मुक्ति, इमिग्रेशन, नेपाली विद्यार्थीका समस्यालगायतका विषयमा छलफल भएको थियो । 

अमेरिकाले विश्वका ६९ देशसँग दोहोरो कर खारेजी सम्झौता गरेको जानकारी दिँदै लुले भने, “यस विषयमा म पहल गर्छु ।” 

छलफलमा अमेरिकी विदेश मन्त्रालयका अन्य कर्मचारी पनि सहभागी थिए । समुदायका केही समस्या परेमा स्टेट डिपार्टमेन्टका वरिष्ठ अधिकारीलाई सम्पर्क राख्न सुझाव दिएका थिए । 

टेक्सस डलास ठुलो संख्यामा नेपालीको बसोबास भएको क्षेत्र हो । यहाँ नेपाली समुदायले थुप्रै क्षेत्रमा करोडौँ लगानी गरेका छन् । 

अन्तरक्रियामा करिब ३० जनालाई सहभागी गराइएको थियो ।