काठमाडौं । पहिलो संस्करणमा ‘वाह !’ भनेर चर्चा कमाएको नेपाल सुपर लिग (एनएसएल) दोस्रो संस्करणसम्म आउँदा चरम विवादमा तानिएको छ । विशेषगरी, सहिद स्मारक ‘ए’ डिभिजन लिगका क्लबहरूले आफूसँग अनुबन्ध भएका खेलाडीलाई एनएसएलले अक्सनको सूचीमा राखेपछि उनीहरू विरोधमा उत्रिएका हुन् ।

एनएसएलले फागुन २० गते खेलाडीको अक्सन गर्‍यो । १० फ्रेन्चाइज क्लबले समान १५ गरी १५० खेलाडीलाई अक्सनमार्फत टिममा अनुबन्ध गरे । अक्सनको ठिक अघिल्लो दिन अखिल नेपाल फुटबल संघ (एन्फा)ले फागुन २० गतेका लागि तोकिएको अक्सन नगर्न पत्र काटेको समाचार बाहिरियो । 

एन्फाका महासचिव इन्द्रमान तुलाधरले आफूले पत्र काटेको बताएका छन् । तर, एनएसएलले आफूलाई आधिकारिक रूपमा पत्र नआएको भन्दै अक्सन गर्‍यो । अक्सनमा एन्फा लिग कमिटीकै संयोजक विज्ञानराज शर्मा काठमाडौं रेजर्सको टेबलमा बसेका थिए ।

त्यस्तै, एन्फाका केन्द्रीय सदस्य रुपेश अधिकारी चितवन एफसीको टेबलमा थिए । अर्का केन्द्रीय सदस्य तथा राष्ट्रिय टोलीका व्यवस्थापक मधुसूदन उपाध्याय पनि उपस्थित थिए । भलै, उपाध्याय कुनै टिमको टेबलमा छैनन् । तर, उनी काठमाडौं रेजर्सका पनि व्यवस्थापक हुन् ।

अक्सनसँग फ्रेन्चाइज क्लबमा अनुबन्धित भएका धेरै खेलाडी दुई क्लबसँग आबद्ध भए । त्यो फुटबलको नियमविपरीत छ । एन्फाले नै यसअघि नियमविपरीत दुई क्लबमा अनुबन्ध भएको भन्दै कारबाही गरेको उदाहरण छन् । तर, एनएसएलको हकमा भने एन्फाले कुनै मुख खोलेको छैन ।

अक्सनपछि एन्फा सदस्य उपाध्यायले भनेका छन्, “पत्रचार त महासचिवज्यूले के गर्नुहुन्छ के गर्नु हुदैन, त्यो हामीलाई थाहा छैन । खेलाडीको कार्यक्रम राम्रो लागेर यहाँ आएको हुँ । मलाई एन्फाले ‘जा’ भनेर आएको पनि होइन । मलाई एनएसएलले बोलाएर आएको पनि होइन । फुटबलप्रेमी भएको हिसाबले म यहाँ आएको हुँ । फुटबलको विकासका लागि यहाँ आएको हुँ ।”

उपाध्यायले भनेजस्तै उनी न एन्फाले पठाएर गएका थिए न एनएसएलले । उनी काठमाडौं रेजर्सका लागि गएका थिए । तर, एन्फाका एक जिम्मेवार पदाधिकारीको हैसियतले उनको अभिव्यक्ति सही थियो त ?

“त्यस्तो त मूर्खले बोल्छन् । उहाँले त कुनै विचार नगरी बोलेजस्तो लाग्छ । कुन आधरमा त्यस्तो बोल्नुभयो ? उहाँ त राष्ट्रिय टोलीको टिम म्यानेजर हो । राष्ट्रिय टोलीकै म्यानेजर भइसकेको मान्छे । त्यसरी एउटा क्लबमा गएर बस्न मिल्छ ? म आफैँलाई एनएसएलका थुप्रै क्लबले प्रस्ताव गरेका थिए । तर, म कतै गइनँ । मेरो नैतिकताले त्यो दिएन । उहाँलाई कुन नैतिकताले त्यस्तो दियो ?,” उपाध्यायको अभिव्यक्तबारे ‘ए’ डिभिजन लिग विजेता मच्छिन्द्र फुटबल क्लबका व्यवस्थापक अनिल श्रेष्ठले भने । 

अक्सनकै दिन बिहानै लिगका संयोजक विज्ञानराज शर्माले पनि पदबाट राजीनामा दिएका थिए । राजीनामापत्रमा उनले लेखेका छन्, “विगत वर्षमा भएको पहिलो र निकट भविष्यमै हुन गइरहेको नेपाल सुपरलिगको दोस्रो संस्करणमा पनि काठमाडौं रेजर्समा आबद्ध भई नेपाली फुटबललाई अझ बढी व्यावसायिक बनाउँदै उद्योगका रूपमा स्थापित गर्न क्रियाशील छु । तसर्थ, लिग कमिटीको संयोजक र काठमाडौं रेजर्सको निर्देशकको रूपमा काम गर्दा कतिपय अप्ठ्यारा आउनसक्ने र नैतिकताको प्रश्न उठ्ने भएकाले आजैको मितिबाट लागु हुनेगरी राजीनामा दिएको छु ।”

एन्फा लिग कमिटीका संयोजक शर्मालगायत एन्फा पदाधिकारीको विषयलाई लिएर गत वर्ष पनि प्रश्न उठेका थिए । तर, त्यतिबेला उनले राजीनामा दिन आवश्यक ठानेनन् । अब एन्फाले जेठ १५ गतेका लागि चुनावी साधारणसभाको मिति तोकेको छ । अब उनको कार्यकाल सकिन केही महिना मात्र बाँकी रहँदा शर्माले राजीनामा दिएका छन् ।

उनको राजीनामाबारे मच्छिन्द्र क्लबका उपाध्यक्षसमेत रहेका श्रेष्ठ भन्छन्, “नेपाली फुटबल विकासका लागि बनेको सर्वोच्च निकाय एन्फाको पदाधिकारी भएर विकास गर्न सकेनन् । नीति निर्माण गर्ने पदमा बसेर फुटबलको विकास गर्न नसक्नेहरूले क्लबमा बसेर गर्न सक्छन् र भन्या ?”

मच्छिन्द्र क्लबका व्यवस्थापक श्रेष्ठले भनेजस्तै शर्मा संयोजक रहेको लिग कमिटीले पहिलो सिजन विनारेलिगेसन लिग गरायो । लिगको मूल मर्म मानिने रेलिगेसन र बढुवा हुने प्रावधान हटाउँदा शर्मा मूकदर्शक भएर बसे । अर्को सिजन एक टोली मात्र रेलिगेसन हुने प्रावधान राखेर लिग गराइयो । अर्को सिजन कोभिड–१९ ले लिग सञ्चालन हुन सकेन । त्यहीबेला एनएसल भयो । जहाँ शर्माले काठमाडौं रेजर्सको निर्देशक भएर काम गरे । एनएसएल हुन सक्दा एन्फाको आफ्नै वार्षिक क्यालेन्डरमा भएको कार्यक्रम राष्ट्रिय लिग भने हुन सकेन ।

“राष्ट्रिय लिगको आवाज त हामीले बारम्बार उठायौँ । खासमा भन्ने हो भने त एन्फाले हामीलाई क्षतिपूर्ति दिनुपर्ने हो । ०७६ सालमा हामी लिग च्याम्पियन भयौँ । च्याम्पियनमा झन्डै पौने दुई करोड खर्च भएको छ । राष्ट्रिय लिगको पुरस्कार एक करोड भनेर भनेको थियो । एन्फाले हामीलाई झुक्कायो । हामीले अस्ति पनि भन्यौँ । राष्ट्रिय लिग गुर्नपर्‍यो भनेर । तर, एन्फा पदाधिकारीले हामीलाई घुमाइरहेका छन्,” श्रेष्ठले भने, “गत वर्ष लकडाउनको बाहना बनायो । एनएसएलचाहिँ त्यही लकडाउनमा गर्न भ्याउने । राष्ट्रिय लिगचाहिँ गर्न नभ्याउने । कस्तो फुटबलको विकास गर्न खोज्नुभएको उहाँहरूले ?”

राष्ट्रिय लिगका संयोजक वीरबहदुर खड्काले लिग गर्नका लागि आफूले खेल तालिका र बजेट पेस गरेको बताए । उनले कार्यसमितिबाट पास हुनेबित्तिकै राष्ट्रिय लिग हुने बताउँछन् । एन्फाका उपाध्यक्ष खड्काले चैत र वैशाखमा गर्ने गरी आठ करोडको बजेट पेस गरेको बताए । 

मोफसलका प्रतियोगिता
‘ए’ डिभिजन लिगका क्लबले अहिले अक्सनका कारण विशेषगरी मोफसलका प्रतियोगितामा टिमको प्रदर्शनमा असर परेको बताएका छन् । सहिद स्मारक ‘ए’ डिभिजन लिगका मच्छिन्द्र फुटबल क्लब, न्युरोड टिम (एनआरटी), सातदोबाटो युथ क्लब, मनाङ–मर्स्याङ्दी क्लब, थ्रीस्टार क्लब, संकटा क्लब, जावलाखेल युथ क्लब र फ्रेन्ड्स क्लब गरी आठ टिमले स्वीकृतिविना खेलाडीलाई नेपाल सुपरलिगको अक्सनमा सूचीकृत गरिएको भन्दै गम्भीर आपति जनाएका छन् ।

क्लबहरूले अक्सनबाट एकै खेलाडी दुई टिममा अनुबन्ध हुने भन्दै गम्भीर आपति जनाएका थिए । त्यससँगै मोफसलका प्रतियोगितामा पनि असर परेको मच्छिन्द्रका व्यवस्थापक श्रेष्ठको बुझाइ छ ।

“चैत मसान्तसम्म खेलाडीहरूले सम्झौता गरेका छन् । कुनै क्लब र खेलाडीबीच त डेढ दुई वर्षसम्मको आपसी सम्झौता छ । हामीसँग अनुबन्ध खेलाडीलाई हामीसँग एकपटक नसोधी एनएसएलको अक्सनमा पठाउन मिल्दैन नि !  कि हामीसँग छलफल गरेको भए हुन्थ्यो । कुनै व्यक्ति आएर हाम्रो खेलाडीको मूल्य तोक्न मिल्छ,” श्रेष्ठले भने, “म त्यसको घोर विरोध गर्छु । हामी सबैले सल्लाह गरेर अघि बढेको भए केही हुदैन्थ्यो । खेलाडीको राम्रो हुन्छ भने त्यसमा हामी खुसी नै हुन्थ्यौँ ।”

गत सिजन विरोध नगर्ने यसपटक किन यति धेरै विवाद त भन्ने प्रश्नमा श्रेष्ठले भने, “गत सिजन हामीसँग खेलाडीको सम्झौता थिएन । त्यसैले हामी चुप बस्यौँ । गत वर्ष र अहिलेको अवस्था फरक छ । हामीले झन्डै साढे दुई करोड खर्च भएको छ । हामीले एन्फा, महानगर, प्रायोजक, लिगबाट र मोफसलका प्रतियोगिताबाट यति आउँछ भनेर हिसाब गरेका हुन्छौँ । त्यसमा १०/१२ मोफसलका प्रतियोगिता खेल्दा कम्तीमा ६/७ वटा जित्छौँ भन्ने लागेको थियो । तर, एनएसएल ठ्याक्कै बीचमा आयो । लिगकै बीचमा मोफसल खेल्नुपर्‍यो । त्यसकारण हाम्रो योजनामा असर गर्‍यो । एनएसएलले गर्दा टिम नै बिग्रिएको छ ।”

एएफसी कपको तयारीमा असर 
लिग विजेता मच्छिन्द्र खप्तड गोल्डकपको पहिलो खेलमै पराजित भएर बाहिरियो । सहिद स्मारक ‘ए’ डिभिजन लिगको सातौँ चरणसम्मको खेल सकिँदा शीर्षस्थानमा रहेकाले एसएफसीकपका लागि छनोट भएको थियो । एनएफले मच्छिन्द्रको एएफसी कप छनोट यात्रामै असर गरेको श्रेष्ठ बताउँछन् ।

“एनएसएल आएको भनेको खेलाडी र क्लबबीचको दूरी आएको छ । हाम्रो टिमको कोचसहित सातजना अक्सनका बेला सात टेबल (टिम) मा बसे,” श्रेष्ठले भने, “हामी एकजुट भएर लिग खलिरहेका हौँ । तर, अक्सनमा मार्की खेलाडी र प्रशिक्षकले हाम्रै टिमका खेलाडीलाई लिएनन् । त्यसकारण टिममा फाटो आएको छ । धेरै असर परेको छ । हाम्रो टिम त फुटिसक्यो । एउटै टिममा यो ललितपुर यो काठमाडौं यो पोखरा थन्डरको भन्ने भएको छ । खेलाडीबीच इगो त भइहाल्छ नि  ! हामी मोफसलमा ‘सी’ डिभिजन लिगको क्लबसँग त हार्‍यौँ । अब एएफसीको के कुरा गर्ने ? मेरो आसा नै मरिसकेको छ । हाम्रो त टिम नै फुटिसक्यो ।”

लिग च्याम्पियन मच्छिन्द्रले एएफसी कप छनोटअन्तर्गत श्रीलंकाको ब्लुस्टार क्लबसँग अप्रिल ५ मा प्रतिस्पर्धा गर्नेछ । उक्त खेलमा जितेमा १२ अप्रिलमा भारतीय टोली मोहन बगानसँग खेल्नेछ । उक्त खेलमा पनि जित निकालेको खण्डमा समूह चरणमा प्रवेश गर्नेछ । र, अगाडिका खेल तालिका निश्चित हुनेछन् । मच्छिन्द्रले ब्लुस्टारलाई जितेर मोहन बगानसँग १२ अप्रिलमा खेल्नुपरेको खण्डमा ९ तारिखबाट सुरु हुने नेपाल सुपरलिग के हुन्छ ? टुंगो छैन ।

“एनएसएलले एएफसी कपका लागि मच्छिन्द्रका खेलाडीलाई छुट दिने भनेको छ । उनीहरू आएर केही राम्रो त भएको छ । उनीहरूबाट हामीले केही सिकेका छौँ । हामीबाट उनीहरूले केही सिकेका छन्,” मच्छिन्द्रका व्यवस्थापक श्रेष्ठले थपे, “तर, यस्तो विनायोजना विनाछलफल एनएसएल आउनु नेपाली फुटबलका लागि दुर्भाग्य हो ।”

क्लबहरूले बार्गेनिङ गरेकोे आरोप !
क्लबहरूमाथि विरोध गरेर एनएसएलसँग बार्गेनिङ गरेको आरोप पनि लागेको छ । तर, श्रेष्ठले त्यो निराधार भएको बताए । 
“हामीले कसैसँग पैसा मागेको छैन,” श्रेष्ठले भने, “एनएसएलको मान्छेसँग मेरो भेट भएको थियो । उनीहरूले खेलाडीलाई पहिलेभन्दा ३० प्रतिशत बढाएर अक्सनमा र मार्की खेलाडीलाई दिएको बताए । र, त्यही बढाएको ३० प्रतिशत रकम खेलाडीलाई दिने भन्छन् । मैले उनीहरूलाई सिधैँ भन्दिए– हेर्नूस् यो खेलाडीबाट कटाउने पैसा हामीलाई चाहिँदैन । क्लबको यो माग नै होइन । कुनै हालतमा लिदैनौँ ।”

एन्फा चुनावले झनै गाँजियो विवाद
एन्फाले जेठ १५ गतेका लागि चुनावी साधारणसभाको घोषणा गरिसकेको छ । उक्त चुनावमा एन्फा अध्यक्ष कर्माछिरिङ शेर्पा र वरिष्ठ उपाध्यक्ष पंकज नेम्वाङबीच प्रतिस्पर्धा हुने पक्काजस्तै छ । एन्फा अहिले दुई धारमा प्रष्टरुपमा विभाजित छ । त्यसको असर एनएसएल र क्लबहरूबीचको विवादमा पनि देखिएको छ ।

“एन्फा चुनावका कारण पनि एनएसएल विवाद बढी गुजल्टिएजस्तो लाग्छ । हाम्रो धारणा प्रष्ट छ । एन्फाले एनएसएलसँग सम्झौता गरेको हो । त्यसैले कुनै पनि पदाधिकारी एन्फको त्यो निर्णयबाट पन्छिन पाउदैनन् । कोही पनि चोखो हुन पाउँदैनन् । तर, उनीहरू एक-अर्कालाई दोषारोपण गरेर पन्छिन खोज्दैनन्,” मच्छिन्द्रका व्यवस्थापक श्रेष्ठ भन्छन्, “मैले राम्रोसँग बुझेको हो कि नबुझेको हो थाहा छैन । एन्फाकै केही पदाधिकारी एनएसएलले मिति थाहा नपाएको भन्छन् । एकअर्कालाई दोष लगाइराखेका छन् । चुनाव जित्नका लागि को राम्रो हुने भन्ने खेल सुरु भएको छ । यस्तो अवस्थामा एन्फाका सबै पदाधिकारी क्लबको पक्षमा एकजुट हुनुपर्ने होइन र ? एनएसएल कहाँबाट, किन र कुन उद्देश्यले आएको हो भनेर क्लबहरूलाई बुझाउनुपर्ने होइन र ?”