काठमाडौं । नेपालमा पछिल्ला केही दिनयता कोभिड १९ को संक्रमण निरन्तर उकालो लाग्दो छ । विशेषगरी भारतसँग सीमाना जोडिएका जिल्ला र काठमाडौं उपत्यकामा धेरै संक्रमित थपिएका छन् ।

कोभिड १९ को नयाँ भेरियन्ट ओमिक्रोन संक्रमितको संख्यासमेत २७ पुगिसक्दा ओमिक्रोनकै कारण संक्रमणको तेस्रो लहर आउने जोखिम बढेको भन्दै विज्ञहरूले सतर्कता अपनाउन सुझाइरहेका छन् । स्वास्थ्य तथा जनसंख्या मन्त्रालयले ओमिक्रोनका कारण संक्रमितको चाप अत्याधिक बढ्नसक्ने भन्दै भिड हुने कार्यक्रम नगर्न र स्वास्थ्यका मापदण्ड पालना गर्न अनुरोध गरिरहेको छ । 

स्वास्थ्य तथा जनसंख्या मन्त्रालयको पुस २४ गतेसम्मको तथ्यांकअनुसार नेपालमा कोभिड १९ का सक्रिय संक्रमितको संख्या ६ हजार १४० पुगेको छ । जसमध्ये सबैभन्दा धेरै २ हजार ९७५ जना काठमाडौं उपत्यकामा छन् । यीबाहेक भारतसँग सीमानाका जोडिएका जिल्लाहरूमा टेस्ट पोजिटिभिटी दर २४ प्रतिशतसम्म पुगेको छ । हालसम्मको तथ्यांकअनुसार कोभिड १९ का सक्रिय संक्रमितको संख्याका आधारमा यी जिल्ला 'हट स्पट'का रूपमा रहेका छन् । 

पछिल्ला केही दिनयता भारतबाट नेपाल भित्रिने नाकामा एन्टिजेन परीक्षणबाट नतिजा पोजिटिभ आउने दर बढेको मन्त्रालयको तथ्यांक छ । पुस २४ गते कञ्चनपुरको गड्डाचौकी नाकामा ७१७ परीक्षण गर्दा ४५ जना पोजेटिभ आएको थियो । त्यसैगरी कैलालीको गौरीफन्टा नाकामा ५९१ परीक्षणमा ७१ पोजेटिभ देखिएको थियोभने प्रदेश १ का विभिन्न प्रयोगशालाबाट गरिएका ७८ वटा नमुनाको परीक्षणमा १८ जनाको नतिजा पोजिटिभ आएको थियो । जुन प्रतिशतका हिसाबले २४.६५ प्रतिशत हो । त्यसैगरी गण्डकीका प्रयोगशालामा परीक्षण गरिएका नमुनाको नतिजाअनुसार १६.२१, लुम्बीनीमा १७.३५ र प्रदेश २ मा ११.८६ प्रतिशतमा संक्रमण पुष्टि भएको थियो । 

झन्डै आधा सक्रिय संक्रमित काठमाडौंमा 
कोभिड १९ का सक्रिय संक्रमितमध्ये ४८.४५ प्रतिशत संक्रमित काठमाडौंमा रहेका छन् । काठमाडौंका प्रमुख ११ वटा अस्पतालमा उपचाररत संक्रमितको संख्या २५० रहेको छ । हिजो थपिएका ९४४ संक्रमितमध्ये ४८१ जना उपत्यकाका तीन जिल्लामा थपिएको मन्त्रलयको तथ्यांकले देखाउँछ । 

'संक्रमण उच्च हुनसक्छ , भयवित होइन सुरक्षित रहौँ' 
नेपालमा पछिल्लो समय बढिरहेको संक्रमणको अवस्थालाई हेर्दा अबका केही सातामा उच्च हुनसक्ने विज्ञहरूको अनुमान रहेको छ । इपिडिमियोलोजिस्ट डा. विराज कर्माचार्य अहिलेको संक्रमण दरलाई विश्लेषण गर्दा माघको दोस्रो साता संक्रमण उच्च हुनसक्ने बताउँछन् ।

सरकारले यो बीचमा खोपलाई तीव्रता दिनुपर्ने र अस्पतालहरूलाई तयारी अवस्थामा राख्नुपर्ने उनको सुझाव छ । भाइरसको जुनसुकै भेरियन्ट आएपनि सर्ने तरिका उस्तै भएकाले जनस्वास्थ्यका मापदण्डको पालन नै संक्रमणबाट बच्ने मुख्य उपाय भएको जनस्वाथ्यविद डा. शरद वन्तको भनाइ छ ।

होम आइसोलेसन र क्वारेन्टिनहरूमा जनस्वास्थ्यका मापदण्डको पालना भए नभएको सरकारले पनि कडाइका साथ अनुगमन गर्नुपर्नेमा डा. वन्तको जोड छ ।