काठमाडौं । साविक विजेता बायर्न म्युनिखले शनिबार राति एक शून्यको नतिजा उल्टाउँदै जर्मन बुन्डेसलिगामा मेइन्जमाथि २–१ को विजय हासिल गरेको छ । दोस्रो स्थानको बोरुसिया डर्टमण्ड भने बोचुमसँग १–१ को बराबरीमा रोकियो । 

एलिनाज एरिनामा भ्रमणकारी मेइन्जले २२औं मिनेटमा करिम ओनिसिओको गोलबाट अग्रता लिएको थियो । जोनाथन बुर्काडटको क्रसलाई ओनिसिओले हेडमार्फत पोष्टको दिशा दिएका थिए । 

५५औं मिनेटमा बायर्नका किङ्सले कोम्यानले बराबरी गोल फर्काए । खेल सकिन १६ मिनेट बाँकी हुँदा जमाल मुसिलाले गरेको गोल बायर्नको जितमा निर्णायक बन्यो । 

जितसँगै प्रशिक्षक युलियन नागेल्समनले जर्मनीको शीर्ष लिगमा १००औं जित दर्ता गराएका छन् । उनले होफेनहेइम, आरबी लाइपजिग र बायर्नबाट यो सफलता हासिल गरेका हुन् । 

जितसँगै नागेल्समने बायर्नले शीर्ष स्थानमा ६ अंकको अग्रता बनाएको छ । बायर्नले १५ खेलबाट ३७ अंक जोडेको छ । दोस्रो स्थानको डर्टमण्डले समान खेलबाट ३१ अंक जोेडेको छ । पराजित मेइन्ज भने २१ अंकका साथ आठौं स्थानमा छ । 

डर्टमण्डले आजै बोचुमसँग १–१ को बराबरी खेल्यो । घरेलु टोली बोचुमले ४०औं मिनेटमा सेबास्टिन पोल्टरको गोलबाट अग्रता लिएको थियो । पोल्टरले पेनाल्टीमा गोल गरेका हुन् । ५४औं मिनेटमा डर्टमण्डका मारिउस उल्फले बराबरी गोल फर्काएका थिए । तर, भिडियो सहायक रेफ्रीले अफसाइड घोषित गरिदियो । 

खेल सकिन पाँच मिनेट बाँकी हुँदा युलियन ब्रान्डटले गोल गरेपछि डर्टमण्ड एक अंक जोड्न सफल भयो । बोचुम २० अंकका साथ दशौं स्थानमा छ ।

अन्य खेलमा चौथो स्थानको होफेनहेइमले पाँचौं स्थानको फ्रेइबर्गलाई २–१ ले हरायो । सातौं स्थानको आरबी लाइपजिगले १३औं स्थानको बोरुसिया मोन्चेनग्लाडबचलाई ४–१ ले पराजित गर्यो । १४औं स्थानको हेर्था बर्लिनले अर्मिनिया बिलेफेल्डलाई २–० ले हरायो । त्यस्तै औसबर्गले कोलनलाई २–० ले पराजित गर्यो ।