दाङ । नेपाली कांग्रेसको १४औँ महाधिवेशनअन्तर्गत दाङमा संस्थापनइतर पक्ष बलियो देखिएको छ । जिल्लामा शनिबार भएको निर्वाचनको परिणाम नियाल्दा केन्द्रीय सदस्य दीपक गिरीको प्यानल हाबी बनेको छ ।

जिल्लाका ६ प्रदेश निर्वाचन क्षेत्रहरूमध्ये पाँचवटामा संस्थापनइतर पक्षधर अर्थात् दीपक गिरीको प्यानलका उमेदवार सभापतिमा निर्वाचित हुनुले त्यही कुराको पुष्टि गरेको जिल्लाका एक नेताले बताए । “आफ्नो रबाफ र प्रभाव रहेको भनिएको पश्चिम दाङमा समेत गेहेन्द्र गिरीको प्यानल बढारिएको छ,” ती नेताले भने, “जसले अब जिल्लामा दीपक गिरीको प्यानल मजबुत भएको पुष्टि गरेको छ ।”

निर्वाचन परिणामानुसार दाङको निर्वाचन क्षेत्र नम्बर–१ (क) मा श्रीपद चौधरी र १ (ख) मा निर्वाचित दिनेश गिरी दुवै संस्थापनइतर पक्षधर हुन् । यी दुवै स्थानमा उनीहरूको प्यानल नै विजयी भएको छ ।

त्यस्तै, दाङ निर्वाचन क्षेत्र नम्बर–२ (क) को सभापतिमा निर्वाचित प्रकाश श्रेष्ठ मात्रै संस्थापन पक्षधर रहेको कांग्रेस दाङका एकजना पदाधिकारीले बताए । त्यहाँ पनि उनको प्यानल नै निर्वाचित भएको छ । संस्थापन पक्षबाट प्रदेश सभापतिमा जित्ने श्रेष्ठ जिल्लाका एक्ला सभापति हुन् ।

दाङ निर्वाचन क्षेत्र नम्बर–२ (ख) को सभापतिमा निर्वाचित अभियान बस्नेत पनि संस्थापनइतर पक्षधर हुन् । त्यहाँ बस्नेतको टिमले अधिकाश पदहरूमा जिते पनि केही पदहरूमा संस्थापन पक्षधर पनि निर्वाचित भएका छन् ।

त्यस्तै, निर्वाचन दाङ क्षेत्र नम्बर–३ (क)मा देवेन्द्र रिजाल र निर्वाचन क्षेत्र नम्बर–३ (ख)मा खिमबहादुर वली प्रदेश सभापतिमा निर्वाचित भएका छन् । उनीहरू दुवैजना संस्थापनइतर पक्षधर हुन् । रिजालको प्यानलबाट एकजना सचिवबाहेक अरू सबै पदाधिकारीले जितेका छन् भने वलीको सम्पूर्ण प्यानल निर्वाचित भएको छ ।