दाङ । आइतबार अपराह्नदेखिको अविरल वर्षाका कारण दाङमा धान र भर्खरै लगाइएको मुसुरो बालीमा क्षति पुगेको छ ।

दाङका अधिकांश स्थानमा काटेको धानबालीमा वर्षाका कारण ठूलो क्षति पुगेको कृषि ज्ञान केन्द्र दाङका सूचना अधिकारी रुद्रमणि पौडेलले जानकारी दिए । उनका अनुसार प्रारम्भिक रूपमा गरिएको अध्ययनले करिब १२ करोड रुपैयाँ बराबरको क्षति पुगेको अनुमान गरिएको छ ।

जिल्लामा यो वर्ष ३९ हजार ६०० हेक्टर क्षेत्रफलमा धान रोपिएको थियो । कृषि ज्ञान केन्द्रले यो वर्ष जिल्लामा धान उत्पादन बढ्ने प्रक्षेपण गरेको थियो ।

कतिपय ठाउँमा काटेर खेतमै सुकाएको धान पानीले भिजाएको छ भने धान नकाटेको ठाउँमा पनि हावासहितको वर्षाले बोट ढालेको छ । काटेर घरमा भित्र्याउने तयारी अवस्थाको धान अविरल वर्षाका कारण खेतमै डुबानमा परेपछि अहिले कृषकहरू धान खेतमा केही भए पनि धान जोगाउन सकिन्छ कि भनेर जुटेका छन् । खेतमा पानी जमेपछि काटेको धान काम नलाग्ने गरी बिग्रिएको र त्यसले जिल्लामा ठूलो क्षति पुगेको कृषि ज्ञान केन्द्र दाङका सूचना अधिकारी पौडेलले जानकारी दिए । उनका अनुसार केही स्थानमा काटेको धानबाली बाढीले बगाएको छ ।

लगातारको वर्षाले धानबाली र भर्खरै रोपिएको मुसुरोमा क्षति गरेको भन्ने जानकारी पाउनासाथ केही स्थानमा सोमबार दिनभरजसो स्थलगत अनुगमन गरिएको उनले बताए । उनले स्थानीय तहसँगको समन्वयमा क्षतिको विवरण संकलनको काम अघि बढेको जानकारी दिए ।

“अहिले हामीले प्रारम्भिक अनुमान गरेका छौँ, भोलिसम्ममा जिल्लाका सबै पालिकामा धानबालीमा भएको क्षतिको यकिन विवरण आउनेछ । तर, १२ करोड बढीको क्षति भयो कि भन्ने हाम्रो अनुमान हो,” उनले भने, “अहिले नै यति नै क्षति भयो भन्न सक्ने अवस्था त छैन, सबै पालिकाहरूबाट यकिन विवरण संकलन भएपछि क्षतिको आधिकारिक अवस्था बारे सार्वजनिक गर्नेछौँ ।”

राप्ती गाउँपालिका–६ का पुरन चौधरीले वर्षाका कारण खेतमा रहेको धान उठाउन नपाई खेतमै उम्रिने अवस्था आएको बताए । दाउने तयारी गरिएको बेलामा स्याहार्न नपाई भिजेर सबै काम नलाग्ने बनेको उनको दुखेसो छ । सो क्षेत्रमा हजारौँ बिघामा लगाइएको धानबालीमा वर्षाले क्षति गरेको छ ।