दाङ । दाङको राप्ती गाउँपालिकाका अध्यक्ष नुमानन्द सुवेदी साढे दुई लाख धरौटी बुझाएर तारेखमा छुटेका छन् । देउखुरी बचत तथा ऋण सहकारी संस्थाको रकम हिनामिना प्रकरणमा दाङ जिल्ला अदालतले तोकेको धरौटी बुझाएर उनी तारेखमा छुटेको जिल्ला अदालतका सूचना अधिकारी धनसिंह गिरीले जानकारी दिए ।
सहकारीका सदस्यहरूले पाँच करोड बढी रकम हिनामिना गरेको अभियोगमा गाउँपालिकाका अध्यक्ष सुवेदीसहित २५ जनाविरुद्ध मुद्दा हालेका थिए । त्यसैको आधारमा जिल्ला अदालत दाङले २० जनाविरुद्ध ३५ दिने म्यादसहित पक्राउ पूर्जी जारी गरेको थियो । घोराहीस्थित जिल्ला अदालतमा आफैँ उपस्थित भएका गाउँपालिकाका अध्यक्षसँग अदालतले साढे दुई लाख धरौटी मागेको थियो ।
यसअघि नै सहकारी संस्थाका सह–लेखापाल २९ वर्षीय विक्रम राना, ऋण फाँटका प्रमुख ३३ वर्षीय प्रताप चौधरी, ऋण फिल्ड सहायक ३६ वर्षीय मणिराम भण्डारी र लेखापाल ३७ वर्षीय विकास न्यौपानेलाई अदालतले पुर्पपक्षका लागि थुनामा राख्न आदेश दिएको थियो ।
रकम हिनामिनाको आरोप लागेकामध्ये कमला पौडेल, युवराज भुसाल, राम पोखरेललगायत सहकारी संस्थाका पदाधिकारी, लेखा परीक्षक, सञ्चालक समितिका पदाधिकारीसहित १९ जना अझै अदालतमा उपस्थित भएका छैनन् । उनीहरूलाई फरा सूचीमा राखिएको छ ।
