काठमाडौं । पूर्वमाओवादीका चार नेताले हालेको रिट सर्वोच्च अदालतले ‘हेर्न नभ्याउने’ सूचीमा राखिदिएको छ । बुधबार आफूहरूले एमालेको सदस्यता नै नलिएको भन्दै माओवादी केन्द्रले पार्टीबाट निष्कासित गरेको निर्णय खारेजीको माग गर्दै सर्वोच्चमा रिट दायर गरेका थिए ।

पूर्वमाओवादी नेताहरू टोपबहादुर रायमाझी, लेखराज भट्ट, प्रभु साह र गौरीशंकर चौधरीले हालेको रिटमा बिहीबारका लागि पेशी तोकिएको थियो । तर, सर्वोच्चले बिहीबार रिट 'हेर्न नभ्याउने' सूचीमा राखिदिएको हो । 

सर्वाेच्च अदालतका न्यायाधीशद्वय बमकुुमार श्रेष्ठ र कुमार रेग्मीको इजलासले गत फागुन २३ गते नेकपा एमाले र नेकपा माओवादी केन्द्रको एकता भंग गर्दै दुवै दललाई अलग काम गर्न आदेश दिएका थियो । त्यही फैसलापछि दुवै दल फलक–फरक अभ्यास गर्दा यी चारै जना नेताले केपी ओलीलाई साथ दिएका थिए ।

फागनु २८ मा उनीहरूसहितलाई एमाले अध्यक्ष ओलीले नेकपा एमालेको केन्द्रीय सदस्यमा नियुक्ति दिएका थिए । त्यसपछि पटक–पटक माओवादी केन्द्रले सरकारबाट फिर्ता हुन आग्रह गर्दा उनीहरूले अटेर गरेका थिए । पछिल्लो समय उनीहरू एमाले बैठकमा सहभागी हुँदै आएका छन् । 

तर, उनीहरूले एमालेको सदस्यता नलिएको अवस्थामा माओवादी केन्द्रले दल त्याग भएको मानेर कारबाही गर्न नसक्ने भन्दै पुनर्वहालीको माग गर्दै रिट दायर गरेका छन् । यी चार जना उनै सांसद हुन् जसले नेकपा माओवादी केन्द्र अवैधानिक भएको भन्दै दल खारेजीको माग गर्दै निर्वाचन आयोगमासमेत उजुरी गरेका थिए ।