जनकपुरधाम । २३ दिनदेखि बेपत्ता महोत्तरीको लोहरपट्टी नगरपालिका–७ की सुजिता ठाकुरको हत्या गरेको आरोपमा उनका श्रीमान र देवर पक्राउ परेका छन् ।  आइतबार महोत्तरी प्रहरीले सुजिताको हत्या गरेको केही प्रमाण फेला पारेपछि उनीहरूलाई नियन्त्रणमा लिएको हो ।

महोत्तरीका प्रहरी उपरीक्षक प्रकाश विष्टले मृतक सुजिताका श्रीमान मुकेश ठाकुर र देवर रूपेश ठाकुरलाई लुकेर बसेको अवस्थामा नियन्त्रणमा लिएर अनुसन्धान थालेको जानकारी दिए ।

सुजिता गत जेठ २० गतेदेखि बेपत्ता भएकी थिइन् । प्रहरीले आइतबार आरोपीको घरबाट करिब डेढ किलोमिटर टाढा रहेको उनीहरूको खेतमा सुजिताको शव गाडेको आशंकामा उत्खनन् गरेको थियो । 

प्रहरीका अनुसार खेत उत्खनन गर्दा केश, रगतले लागेर रातो भएको माटो, मलखाद र नुन भेटिएको छ । सोही प्रमाणका आधारमा आवश्यक अनुसन्धानका लागि उनीहरूलाई पक्राउ गरिएको प्रहरीले जनाएको छ ।