काठमाडौं । लामो दूरीका सार्वजनिक यातायात एवं आन्तरिक हवाई सेवा सञ्‍चालनमा आएसँगै पर्यटकीय गतिविधिमा सुधार आउने अपेक्षा व्यवसायीको छ । सोही अपेक्षासहित देशका प्रमुख गन्तव्यहरुमा पर्यटकीय गतिविधि पनि सुरु हुन थालेका छन् । तत्कालका लागि विदेशी पर्यटकको सम्भावना निकै न्यून रहेकाले आन्तरिक पर्यटकमा नै व्यवसायी केन्द्रित छन् । 

सरकारले पनि आन्तरिक पर्यटन प्रवर्द्धनका लागि लागि नयाँ योजना ल्याउने तयारी गरिरहेको पर्यटन मन्त्री योगेश भट्टराईले भन्दै आएका छन् । आन्तरिक पर्यटन प्रवर्द्धनकै लागि साप्ताहिक दुई दिन बिदाको अवधारणा अगाडि सारिएको छ । दुई दिन बिदाको अवधारणालाई कार्यान्वयनमा ल्याउन व्यवसायीहरुले लबिइङ पनि गरिरहेका छन् । नाट्टाका अध्यक्ष अच्यूत गुरागाईं आन्तरिक पर्यटन प्रवर्द्धन गर्नकै लागि दुई दिन साप्ताहिक बिदा दिइनुपर्ने बताउँछन् । 

अर्को निजी क्षेत्रसँगको सुझावका आधारमा नेपाल पर्यटन बोर्डले आन्तरिक पर्यटन प्रवर्द्धनका लागि विभिन्‍न टुर प्याकेज बनाएको छ । देशका विभिन्‍न स्थानहरुलाई समेटेर बनाएको टुर प्याकेजको शुल्क तोक्ने जिम्मा बोर्डले निजी क्षेत्रलाई नै दिएको छ । बोर्डले तयार पारेको टुर प्याकेजले आन्तरिक पर्यटनलाई टेवा पुर्‍याउने प्रमुख कार्यकारी अधिकृत धनञ्जय रेग्मी बताउँछन् । बोर्डले तयार पारेको प्याकेजलाई अन्तिम रुप दिन पर्यटन व्यवसायसँग सम्बन्धित संघ-संस्था लागि परेका छन् । 

आन्तरिक पर्यटन नै विकल्प
तत्काल पर्यटकीय गतिविधिलाई चलायमान बनाउने भनेको आन्तरिक पर्यटनबाट नै भएको व्यवसायी बताउँछन् । आन्तरिक पर्यटकीय गतिविधिले विदेशीलाई समेत सकारात्मक सन्देश दिने र उनीहरुलाई पनि आकर्षित गर्न सक्ने विश्वास व्यवसायीमा छ । टानका अध्यक्ष खुमबहादुर सुवेदी आन्तरिक पर्यटकीय गतिविधिले नै विदेशीलाई आकर्षित गर्न सक्ने बताउँछन् । आगामी दिनमा यसले विदेशीलाई सकारात्मक सन्देश दिने भन्दै स्वास्थ्य सुरक्षालाई भने गम्भिरताका साथ लिइनुपर्ने उनी बताउँछन् । 

नेपाल पर्यटन बोर्डका पूर्वप्रमुख कार्यकारी अधिकृत दीपकराज जोशी पर्यटन गतिविधिका लागि ‘मुभमेन्ट’ नै पहिलो आवश्यकता भएको र त्यो खुला गरिएसँगै सकारात्मक सन्देश आन्तरिक पर्यटकमा गएको बताउँछन् । अब सुरक्षाका मापदण्डको पालनालाई विशेष ध्यान दिइनुपर्ने उनको भनाइ छ । यस्तै घुम्‍न सर्वसाधारणलाई उत्साहित बनाउनुपर्ने उनको सुझाव छ । त्यसका लागि सरकार, पर्यटन बोर्ड, पर्यटन व्यवसायीका संघ संस्थाहरुले ‘क्याम्पेन’ चलाउनुपर्ने उनको सुझाव छ । 

आन्तरिक पर्यटकीय गतिविधिले विदेशीलाई सकारात्मक सन्देश दिने उनको पनि भनाइ छ । “आगामी एक/दुई महिनामा आन्तरिक पर्यटन चलायनमा हुँदा जोखिम देखिएन भने त्यसले अन्तर्राष्ट्रिय पर्यटकहरुलाई सकारात्मक सन्देश दिन्छ । त्यसैले पनि स्वास्थ्य सुरक्षाको पालनामा कन्जुस्याई गर्न भने हुँदैन,” उनले भने । अहिले सुरक्षित तबरले गतिविधि सञ्‍चालन भए भने नोभेम्बर/डिसेम्बरमा विदेशबाट सानो-सानो समूहमा पर्यटक आउने उनको विश्वास छ । 

आन्तरिक पर्यटनका गतिविधि सुरक्षित तरिकाले सञ्‍चालन गर्न सकिए त्यसले पर्यटन उद्योगसँग सम्बन्धित सबै व्यवसायलाई टेवा पुर्‍याउने विश्वास निजी क्षेत्रमा छ । आन्तरिक पर्यटकीय गतिविधि बढाउन निजी क्षेत्रका वायुसेवा कम्पनीहरु पनि लागिपरेका छन् । बुद्ध एयर, यति एयरलाइन्सले विभिन्‍न टुर प्योकज घोषणा गरिसकेका छन् । 

अबको विकल्प आन्तरिक पर्यटन नै भएकाले यसमा लाग्नुको विकल्प नभएको यति एयरलाइन्सका प्रमुख कार्यकारी अधिकृत अनुज रिमाल बताउँछन् । त्यसैले यति एयरलान्यसले एभरेस्ट, रारा, पोखरा, सौराहा, मुक्तिनाथ, अन्तपूर्णलगायत ट्रेक, काठमाडौं उपत्यकालक्षित गरी टुर प्याकेज ल्याएको उनले बताए । “आन्तरिक पर्यटन प्रवर्द्धन विकल्प छैन,” उनले बताए । 

होटेल संघ नेपालका वरिष्ठ उपाध्यक्ष विनायक शाह अहिलेको अवस्था पनि पर्ख र हेरको नै रहेको बताउँछन् । सार्वजनिक यातायात र हवाई सेवा खुला गर्दा नै सकारात्मक सन्देश प्रवाह भएको उनले बताए । तर स्वास्थ्य सुरक्षासम्बन्धी मापदण्डको पालनामा भने कमजोरी गर्न नहुनेमा उनले जोड दिए । “स्वास्थ्य सुरक्षाको पालनामा कडाइ गर्नुपर्छ । सुरु सुरुमा पालना गर्नेपछि विस्तारै छाड्दै जाने चलन छ, त्यसलाई कडाइका साथ पालना गराउनुपर्छ,” उनले भने । उनले जनता पनि सचेत बन्नुपर्ने बताए । “अहिलेको अवस्था भनेको आफू बाँच्ने र अरुलाई पनि बचाउने हो । त्यसमा सबै सतर्क हुनुपर्छ, जनता पनि सचेत बन्नुपर्छ ।”

तत्काल सर्वसाधारण बाहिर निस्कन डराउने गरेको भए पनि पर्यटन गतिविधि भने सुरु गरिएको पोखरा पर्यटन परिषद्का अध्यक्ष चिरञ्जीवी पोखरेल बताउँछन् । सार्वजनिक यातायात, आन्तरिक हवाई सेवा सुरु भएपछि होटेल, पर्यटकीय क्षेत्र विस्तारै खुल्न थालेको उनले बताए । “ग्राहक आउन सकिरहेका छैनन्, तर हामी सुरक्षित तरिकाले सेवा दिन तयार भएर बसेका छौं,” उनले भने । -फाइल तस्बिर : बाह्रखरी