फाइल तस्बिर।

चितवन  । भरतपुर अस्पतालमा उपचाररत थप एक जना कोरोना संक्रमित महिलाको मृत्यु भएको छ ।

चितवनको राप्ती नगरपालिका - ९ की ३५ वर्षीया महिलाको उपचारको क्रममा मृत्यु भएको हो । अस्पतालका सूचना अधिकारी लीलाधर पौडेलले ती महिलाको बिहीबार साँझ ५ बजेर १० मिनेटमा मृत्यु भएको जानकारी दिए ।

पौडेलका अनुसार ती महिला खोकी र श्वासप्रश्वासमा समस्या देखिएपछि भदौ १४ गते अस्पताल भर्ना भएकी थिइन् । उनको भदौ १७ गते कोरोना संक्रमण पुष्टि भएको थियो  । मिर्गौला रोगीसमेत रहेकी उनको तीन महिनादेखि डायलाइसिस चलिरहेको पौडेलले जानकारी दिए । 

उनको भेन्टिलेटरको सहायताले सघन उपचार कक्ष (आईसीयू)मा राखेर उपचार भइरहेको थियो । 

योसँगै आज मात्रै चितवनमा मृत्यु हुनेको संख्या तीन पुगेको छ । तीमध्ये एक पुरुष नवलपरासी गैडाकोटका हुन् । चितवनका मात्रै कोरोनाबाट मृत्यु हुनेको संख्या ११ पुगेको छ ।