![सरकारको विरोधमा नेविसंघको मसाल जुलुस](https://12khari.top/uploads/posts/2020-04-30_nebi_1730975474.jpg)
चितवन । नेपाल विद्यार्थी संघ चितवनले आज साँझ मसाल जुलुस निकालेको छ ।
सरकारले कोरोना भाइरस नियन्त्रणका लागि गरेको लकडाउनको मौका छोपी कोरोना नियन्त्रणभन्दा सरकारको ध्यान राजनीति तर्फ केन्द्रित भएको भन्दै यसको विरोधमा मसाल जुलुस प्रदर्शन गरेको हो ।
भरतपुर कोरोना बिशेष(अस्थाई) अस्पताल भएको अनियमितताका बिषय र सांसद अपहरण जस्ता विषयमा सरकार जिम्मेवार र गम्भिर नभएको नेबिसंघको आरोप छ । नेविसंघ चितवनका नेता परमेश्वर खनालको नेतृत्वमा गरिएको प्र्रदर्शन भरतपुर महानगरपालिका वडा नम्बर १० को नहरचोकबाट निस्किएको मसाल जुलुस बिशालचोक पुगेर कोण सभामा परिणत भएको थियो ।
कोण सभालाई सम्बोधन गर्दै नेविसंघ नेता खनालले सरकारले जनतालाई बिश्वासघात गरेको आरोप लगाए । सरकार अहिले संकटको घडीमा राजनीति गरेर बस्न चाहेको भन्दै उनले प्रधानमन्त्री ओलीको राजीनामा माग गरे ।
प्रधानमन्त्रीले नैतिकताका आधारमा राजीनामा दिएर मार्ग प्रशस्त गर्नुपर्ने उनको जोड थियो । अहिलेको सरकारकाले भ्रष्टाचारीको संरक्षण गरेको र अपराधिलाई जोगाएको उनको भनाई थियो ।
भरतपुरमा रहेको कोरोना बिशेष अस्थाई अस्पतालमा भएको अनियमितता र चोरीको घटनाको सत्य तथ्य छानबिन गर्न समेत विद्यार्थीले माग गरेका थिए ।
सो अबसरमा नेविसंघ चितवनका बिद्यार्थी नेताहरु कृष्ण वगाले, बसन्त गैरे, राजेश भूषाल लगायत विद्यार्थीहरुले सरकारको तीब्र आलोचना र विरोध गर्दै मसाल जुलुस निकालेका हुन । आज बिहान पनि कोरोना बिशेष अस्पतालको अनियमितताको बिषयमा तत्काल र अनुसन्धानको माग गर्दै भरतपुरको चौबीसकोठीमा प्रदर्शन नेविसंघले प्रर्दशन गरेको थियो ।