काठमाडौं । काठमाडौंका विभिन्न स्थानमा सञ्चालित तरकारी बजारमा उपभोक्ताको भीड लाग्दा कोरोना संक्रमणको जोखिम बढेको छ ।

सरकारले कोरोना भाइरस (कोभिड–१९) को रोकथाम तथा नियन्त्रणका लागि २५ जनाभन्दा बढी एकै ठाउँमा भेला नहुन आदेश गरेको छ । तर काठमाडौं उपत्यकामा सञ्चालित विभिन्न तरकारी बजारमा सयौंको संख्यामा तरकारी खरिद गर्नेको भीड हुने गरेको छ । 

काठमाडौंको पुरानो बसपार्क, लैनचौर, टुकुचा, तीनकुनेलगायत ठाउँमा रहेका तरकारी बजारमा हरेक दिनजसो उस्तै भीड देख्न सकिन्छ । तरकारी बजारमा झुन्डझुन्डमा मानिसहरूले तरकारी किनिरहेका थिए । 

सामाजिक दूरी कायम गर्ने विषयलाई बेवास्ता गर्दै मानिसहरूले तरकारी किनिरहेका थिए । बजारमा साबुनपानीले हात धुने व्यवस्था पनि गरिएको छैन । यस्तै स्यानिटाइजरको प्रयोग पनि भएको देखिँदैन । केही व्यक्तिहरूले मास्क र पञ्जा भने लगाएको देखिन्छ । 

अस्थायी बजारका रूपमा रहेका यस्ता तरकारी बजारमा उपभोक्ताको भीड अस्वाभाविक बढेकाले कोरोना संक्रमणको जोखिम बढाएको छ । यस्तै काठमाडौंको भृकुटीमण्डपस्थित टुकुचा बजारमा पनि तरकारी खरिद–बिक्री गर्नेको भीड उस्तै देखिन्छ । यद्यपि यो अस्थायी बजार भने होइन ।

सरकारले करिब दुई साताअघि कालीमाटी तरकारी बजारमा भीड बढेको भन्दै उपत्यकाका विभिन्न ११ स्थानमा अस्थायी तरकारी बजार सञ्चालनमा ल्याएको थियो । यसबाहेक पनि व्यापारीहरूले उपत्यकाका कतिपय चोकमा सडकमै तरकारी बिक्री गर्न राखेका छन् । तरकारी बजारलाई व्यवस्थित बनाउन नसक्दा सयौंको संख्यामा भीड लाग्ने गरेको छ भने यसबाट कोरोना भाइरस संक्रमणको जोखिम बढेको छ । 

बल्खु बजारमा तरकारी किनबेचका लागि जम्मा भएका सर्वसाधारणको भीड । हेर्नुहोस् थप तस्बिर :