काठमाडौं । विश्व अहिले कोरोना भाइसरको त्रासमा छ । कोरोनाकै कारण विश्व अर्थतन्त्रसँगै खेलकुद क्षेत्र पनि अछुतो रहन सकेन । अझ भन्ने हो भने विश्वका अधिकांश ठूला खेलकुद प्रतियोगिताहरू अनिश्चित कालका लागि स्थगित भइसकेका छन् । केही सञ्चालनमा रहेका प्रतियोगिता पनि दर्शकबिना बन्द रंगशालामा भइरहेका छन् ।

अमेरिकन बास्केटबल लिग, युरोपनियन च्याम्पियन्स लिग र युरोपका घरेलु लिग जस्ता ठूला प्रतियोगिताहरू स्थगित भएका छन् । यसै वर्षको जुलाइमा जापानमा आयोजना हुने तय भएको ओलम्पिक सार्न छलफल भइरहेको छ । विभिन्न देशले ओलम्पिक छनोट स्थगित गरेका छन् ।

छिमेकी भारत र पाकिस्तानले पनि आफ्ना जारी प्रतियोगिता बिना दर्शक बन्द रंगशालामा खेलाइरहेका छन् । पाकिस्तानले ठूलो क्रिकेट प्रतियोगिता पाकिस्तान सुपर लिग (पीपीएल) बन्द रंगशालामा खेलाउँदै आएको छ । भारत सरकारले विदेशी खेलाडीलाई अप्रिल १५ सम्म प्रवेशकमा रोक लगाएपछि मार्च २९ बाट सुरु हुने इन्डियन प्रिमियर लिग (आईपीएल) पनि १८ दिनका लागि सरेको छ ।

विश्व स्वास्थ्य संगठन (डब्लुएचओ) ले समेत यसलाई महामरीको घोषणा गर्दै सतर्कता अपनाउन आग्रह गर्दै आएको छ । नेपाली खेलकुदको सर्वोच्च निकाय राष्ट्रिय खेलकुद परिषद् (राखेप) र खेलकुद मन्त्रालयले समेत सबै संघ संगठनहरूलाई खेल गतिविधि स्थगित गर्न विज्ञप्ति जारी गर्दै निर्देश गरिसकेका छन् । यता नेपाल सरकारले पनि भिडभाड नगर्न र हुलमुलमा नजान आग्रह गरेको छ ।

मन्त्रालय र राखेपको आग्रहबमोजिम नेपालकै ठूलो फ्रेन्चाइज क्रिकेट प्रतियोगिता एभरेस्ट प्रिमियर लिग (ईपीएल) पनि अनिश्चितका लागि स्थगित भएको छ । मोफसलका ठूला प्रतियोगिताहरू स्थगित भएका छन् । गत साता घोषणा गरेको पहिलो उपमेयर महिला फुटबल लिग कोरोनाकै कारण एन्फाले स्थगित गर्‍यो ।

घरेलु मैदान दशरथ रंगशालामा आयोजना हुने कतार विश्वकप छनोटका दोस्रो चरणका खेलहरू समेत फिफा र एएफसीले अनिश्चित कालका लागि स्थगित गरे । कोरोना कै कारण देखाउँदै सुरु भएको राष्ट्रिय टोलीको बन्द प्रशिक्षण पनि स्थगित भयो । तर, एन्फाको मैदानमा सञ्चालित प्रतियोगिता ‘बी’ डिभिजन लिग अपवाद बन्न पुग्यो ।

राष्ट्रिय टोलीको बन्द प्रशिक्षणमा सतर्कता देखिएको एन्फा ‘बी’ डिभिजन लिगका लागि भने पछि हटेको छ ।

चैतको अन्तिम सातासम्म चल्ने ‘बी’ डिभिजन लिगमा दर्शक राख्दै एन्फाले प्रतियोगिता सञ्चालन गरिरहेको छ । ११ चरणसम्म चल्ने लिगका भर्खर चौथो चरणमा खेल सकिएका छन् । एन्फाका प्रवक्ता किरन राईले सतर्कताका साथ लिग सञ्चालन गरिरहेको बताए । तर, एन्फाले गेटमा थर्मल गर्नबाहेक अन्य कुनै सतर्कता अपनाएको पाइँदैन ।

यस विषयमा एन्फाका अध्यक्ष कर्मा छिरिङ शेर्पाले सानो विषय भन्दै बोल्न अस्वीकार गरे । अध्यक्ष शेर्पाले आफूलाई सानो विषयमा बोल्ने अधिकार नदिएको समेत बताए । 

“प्रतियोगिता सरकारको सूचना पूर्व सञ्चालन भएकाले लिगलाई स्थगित गर्न नसकिएको हो,” प्रवक्ता राईले भने, “लिगका लागि लाखौं खर्च भइसकेको छ । एन्फालाई आर्थिक भार पर्ने अवस्था सृजना हुने भएकाले प्रतियोगिता जारी राखेका हौं ।” 

राईको भनाइलाई मान्ने हो भने मोफसलमा आयोजना हुने तयारी भएका प्रतियोगितामा कुनै खर्च भएको छैन ? ईपीएलले विदेशी खेलाडीलाई प्रतियोगितामा सहभागिता गराउन करोडौंको खर्च नगरेको हो र ?

प्रवक्ता राईले दर्शकको चाप धेरै नभएको र कोरोनाको प्रभाव देखिए प्रतियोगिता स्थगित गर्ने जानकारी दिए । “नेपालमा कोरोनाको खासै प्रभाव देखिएको छैन । प्रभाव देखिए हामी खेल स्थगित गर्ने छौं,” राईले भने ।

नेपालमा कोरोनाको प्रभाव नभए मोफसलका गोल्डकप स्थगित गर्न एन्फाले किन निर्देशन दियो । महिनौं चल्ने प्रतियोगिता सञ्चालन गर्न हुने तर १०–१५ दिनमा सकिने गोल्डकपलाई कोरोनाको प्रभाव भन्ने एन्फाको सोच सही हो ?

राखेपका उपाध्यक्ष पीताम्बर तिम्सिनाले कुनै पनि प्रतियोगिता सञ्चालन नगर्न निर्देशन दिँदा नमाने पुनः खबरदारी गर्ने बताए । उनले खबरदारी गर्दा समेत अटेर गरे कारबाही गर्न पछि नहटने दाबी गरे । विश्वमा ठूला खेल प्रतियोगिता स्थागित हुँदा र खेलाडीमाथि संक्रमण देखिँदा, शोक मनाई रहेका बेला बेवास्ता गर्न खोज्नुलाई एन्फाको लापरबाही भन्न सकिँदैन र ?