काठमाडौं । ललितपुरको भारदेउमा रहेको एउटा घरमा चारजनाको परिवार । एउटा मात्र कोठा रहेको यो घरमा आमाबुबासँगै दाजुभाइ बस्छन् । यो परिवारको भान्सा पनि यही कोठा हो । यही परिवारका एक सदस्य भने गल्फर सुवास तामाङ हुन् ।

घरेलु भूमिमा आयोजना भएको १३औँ दक्षिण एसियाली खेलकुद (साग) का स्वर्ण पदक विजेता सुवास यतिबेला मख्ख छन् । एउटै कोठामा जेनतेन चलिरहेको चारजनाको परिवारका लागि कसैले घरै बनाइदिन्छु भनेपछि सुवास पनि पुलकित नबन्ने कुरै भएन । अहिले उनी घर बन्ने भनेपछि निकै खुसी पनि छन् । 

उसो त घर बन्ने भनेर मख्ख परेका सुवास भाइलाई राम्रो बोर्डिङ स्कुलमा पढाउने तयारी पनि गर्दै छन् । उनको घर बन्नु र भाइले राम्रो बोर्डिङ स्कुलमा पढ्न पाउनु एकैपटक हुने भएको छ । “मेरो पहिलो सपना भनेको घर बनाउनु र भाइलाई राम्रो बोर्डिङ स्कुलमा पढाउनु हो,” सुवासले बाह्रखरीलाई सुनाए ।

अहिले कक्षा ३ मा पढ्दै गरेका उनका भाइ आगामी शैक्षिक–सत्रदेखि भने काठमाडौंको एक निजी विद्यालयमा पढ्ने भएका छन् । सुवासको भाइको पढाइको चाँजोपाँजो भने नेपाल गल्फ संघका महासचिव सीबी भण्डारीले मिलाएका छन् । उनले आफैंले सञ्चालन गरेको स्कुलमा सुवासका भाइको पढाइ निःशुल्क गरिदिने भएका छन् । उनको आवासका लागि लाग्ने खर्च भने संघले व्यहोर्नेछ । “सुवासका भाइको स्कुल खर्च बोर्डिङले फ्री गरेको छ । अब आवासका लागि संघले पहल गर्नेछ,” संघका अध्यक्ष टासी घलेले भने, “आवासका लागि संघले प्रायोजक खोज्नेछ । प्रायोजक नभेटे संघ र पदाधिकारी मिलेर तिर्नेछौं । हामी सबैले अठोट गरिसकेका छौं कि सुवासको सपना पूरा गर्नु छ ।”

कहिले बन्छ घर ?

गल्फ संघको पहलमा बन्न लागेको घर एक वर्षभित्र बनाइसक्ने संघको योजना छ । तर, योजना सफल बनाउन संघले पहल अघि सारेको छैन । विश्वमा महामारीको रूप लिइरहेको कोरोना भाइरसका कारण कुनै प्रक्रिया अघि बढाउन नसकेको संघका अध्यक्ष घले बताउँछन् । 

“सुवासको घर २०२० भित्रै बनाएर हस्तान्तरण गर्ने योजनामा छौं । तर, कोरोनाका कारण कुनै कदम चाल्न सकिरहेका छैनौं,” उनले भने । संघसँग आर्थिक अभाव हुँदा पनि काम सुरु नभएको घलेले बताए ।

“संघसँग आर्थिक अभाव छ । हामीले सहयोग उठाएर सुवासको घर बनाउने निर्णय गरेका हौं । यसका लागि संघले पहल गर्नेछ,” उनले भने, “हामी घर निर्माणका लागि एक च्यारिटी प्रतियोगिता आयोजना गर्ने योजनामा छौं । तर, कोरोनाले गर्दा हुन पाएको छैन । कोरोनाको प्रभाव घट्नेबित्तिकै हामी सुवासको घरको डिजाइनको योजना बनाउनेछौं । अन्य व्यावसायिक व्यक्तिहरूसँग पनि पहल गर्नेछौं ।” 

उनले सुवासको घर बनाउने योजनामा धेरै संघ–संस्था पनि सहयोगका लागि इच्छुक रहेको बताए ।

कस्तो बन्छ घर ?

अहिले एउटा कोठामा बस्दै आएका गल्फर सुवासको परिवारका लागि संघले तीन कोठाको पक्की घर बनाइदिने योजना बनाएको छ । “हामी तीन कोठाको एकतले पक्की घर बनाइदिने योजनामा छौं । तर, उनीसँग जमिन कति छ । त्यो लेखाजोखा गर्न पाएका छैनौं,” अध्यक्ष घलेले भने, “हामी पहिला जमिनको आकार (लम्बाइ र चौडाइ) हेर्नेछौं । किनकि हामीले सुवाससँग जमिन थोरै छ भन्ने सुनेका छौं । त्यसको विषयमा पछि छलफल हुनेछ ।” 

दुई वर्षअघि संघकै पहलमा दुई गल्फरको घर निर्माण गरिएको थियो । संघले टंकबहादुर कार्कीको घरलाई मर्मत गरेको थियो । त्यस्तै अर्का गल्फर सूत्रबहादुर राईको घर निर्माण गरिदिएको थियो । राईका लागि धरानमा एकतले पक्की घर निर्माण गरिएको थियो । उक्त घर संघले पाँच लाख सहयोगमा निर्माण गरेको हो । 

अर्को लक्ष्य एसियन गेम

१३औं सागमा दुई स्वर्ण पदक जितेका सुवासको लक्ष्य अब एसियन गेम हो । यो लक्ष्य उनको मात्र नभई संघको समेत हो । सागमा उनले एकल र टिम गरी दुई विधामा नेपाललाई स्वर्ण पदक दिलाएका थिए । त्यस्तै सुवासले नेपालगन्जमा सम्पन्न आठौं राष्ट्रिय खेलकुदमा सिल्भर मेडल जितेका थिए । 

सागमा चार दिन खेल्दा १४ अन्डर अर्थात् ७२ होल गरेका कारण सुवास एसियन गेममा पनि राम्रो नतिजा निकाल्न सक्ने क्षमता भएको खेलाडी हुन् । “अब संघको लक्ष्य सुवासलाई एसियन गेमका लागि तयार पार्नु हो । उनी एसियन गेममा पनि राम्रो नतिजा निकाल्न सक्ने क्षमता राख्द छन्,” अध्यक्ष घलेले भने, “उनले सागमा मात्र ७२ होल गरेका थिए । जुन राष्ट्रिय प्रतियोगितामा हालसम्मै उच्च हो । प्रोफेसनल प्रतियोगितामा नेपाका थोरै मात्र खेलाडीको यो नतिजा निकालेका छन् । यो नतिजा राष्ट्रिय खेलमा नेपालका लागि कीर्तिमानी हो । उनले १७ वर्षको उमेरमा नै उत्कृष्ट खेलेर देखाएका छन् ।” 

सागमा उनीसँगै दोस्रो स्थान हासिल गरेका बंगलादेशका खेलाडीले ४ अन्डर र तेस्रो भएका सूत्रबहादुर राईले ३ अन्डरको नतिजा निकालेका थिए ।

उनलाई एसियन गेमको तयारीका लागि सबैखाले प्रतियोगितामा सहभागिता गराउने संघको योजना छ । आउँदो मेमा सुवासलाई संघले एसियन प्यासिफिकका लागि अस्ट्रेलिया पठाउने भएको छ । 

त्यस्तै जुलाईमा मलेसियामा हुने अन्तर्राष्ट्रिय अम्याचुयर गल्फ प्रतियोगितामा सहभागिता हुने संघले जनाएको छ । साउन र भदौमा उनी प्रशिक्षकका लागि भारतको बैगलोर जाने छन् । त्यसपछि उनी सेप्टेम्बरमा मेलबर्नमा हुने एसियन अम्याचुयर प्रतियोगिताका लागि त्यसतर्फ प्रस्तान गर्ने योजना रहेको संघले जनाएको छ ।