काठमाडौं । ऐतिहासिक रानीपोखरीको पुनर्निर्माण अहिले धमाधम भइरहेको छ । यसको काम यही वैशाखमै सकिने गरी भइरहेको राष्ट्रिय पुनर्निर्माण प्राधिकरणले जनाएको छ । 

सीएमजेभी निर्माण कम्पनीले रानीपोखरीमा रहेको मन्दिर र पुल निर्माणको काम गरिरहेको छ भने पोखरीको सतहको काम भने उपभोक्ता समितिमार्फत हुँदै छ । २०७२ को भूकम्पले क्षति पुगेको रानीपोखरी पुनर्निर्माण सम्पन्नउन्मुख भएसँगै यसमा कहाँको पानी राख्ने विषयमा भने अहिले बहस चलेको छ । यहाँ राख्ने पानी कहाँको हुने भन्नेमा निर्क्योल नहुँदा अन्योल उत्पन्न भएको संरक्षणकर्मीहरू बताउँछन् । 

“पोखरीभित्र आठ ठाउँमा बोरिङ गर्दा पनि पानी नआएपछि त्रिचन्द्र कलेजछेउ दुई ठाउँमा डिप बोरिङ गरी पानी हाल्न लागिएको हो,” रानीपोखरी पुनर्निर्माण उपभोक्ता समितिका सचिव रोशन तुलाधरले बाह्रखरीसँग भने । उनका अनुसार त्यही पानी ‘ट्रिटमेन्ट’ गरी रानीपोखरीमा माछा पाल्न मिल्ने गरी तयारी भइरहेको छ । 

पहिले रानीपोखरीकै जमिनमुनिबाट पानी आउने गर्थ्यो तर अहिले बढ्दो सहरीकरणलगायत कारणले पानीको सतह घटेको छ । यसैले पनि रानीपोखरीमा पानी टिकाइराख्न सतहमा डेढ फुट कालो माटो राखेर पानीलाई नचुहिने गरी पुनर्निर्माण गरिएको छ ।

यता खानेपानी तथा सरसफाइमन्त्री बिना मगरले काठमाडौं उपत्यकाभरिका पोखरी र ढुंगेधारा संरक्षणका लागी मन्त्रालयमै भएको कार्यक्रममा रानीपोखरीमा बोरिङको पानी हाल्न नदिने बताइन् । उनले डिपबोरिङले काठमाडौंका ढुंगे धाराहरू सुकेको बताउँदै यस्तो गर्न नदिने बताइन् । उनले भनिन्, “बरु रानीपोखरीमा आकासे पानी वा मेलम्चीको पानी हाल्छौं ।” सम्पदा संरक्षण अभियन्ता आलोक तुलाधर भने रानीपोखरीमा प्राकृतिक रूपमै पानी आउने बताउँछन् । 
तस्बिर : बाह्रखरी