काठमाडौं । २०७२ वैशाख १२ को विनाशकारी भूकम्पले क्षतिग्रस्त रानीपोखरी पुनर्निर्माणले गति लिएको छ । भूकम्प गएकै दिन उद्घाटन गर्ने महानगरपालिकाको योजना छ ।

पोखरीको निर्माण, बालगोपालेश्वर मन्दिर र रानीपोखरीभित्रको सौन्दर्यीकरण गरी तीन चरणमा धमाधम काम भइरहेका छन् । पोखरीभित्र कालोमाटो भर्ने र इँटा छाप्ने कामले पनि गति लिएको छ । पुनर्निमाणलाई प्रभावकारी बनाउन दुई जिम्मोवार निकाय क्रियाशील छन् । सीएमजेभी निर्माण कम्पनीले मन्दिर, पुल तथा बगैंचाको जिम्मा पाएको छ भने उपभोक्ता समितिले पोखरी निर्माणको जिम्मा लिएको छ ।

समितिले दिएको जानकारीअनुसार मन्दिर प्रताप मल्ला कालीन शिखर शैलीमा करिब २४ करोडको लागनमा निर्माण हुँदैछ । रानीपोखरी पुनर्निर्माण उपभोक्ता समितिका सचिव रोशनकाजी तुलाधरले बाह्रखरीसँग कुरा गर्दै गत फागुन २० बाट पुनर्निर्माण सुरु भएको बताए । 

“बाहिरबाट हेर्दा धेरै काम भएको देखिँदैन, तर भित्रिरूपमा रानीपोखरी पुनर्निर्माणले गति लिएको छ, हामी आगामि वैशाख १२ गते भूकम्प गएकै दिन उद्घाटन गर्ने गरी लागि परेका छौं,” उनले भने ।

“पुल र पर्खालको काम ८५ प्रतिशत सकिएको छ । पोखरी निर्माण अन्तिम चरणमा पुगेको छ । पोखरीको फेदमा इटा छापिएको छ भने कालो माटो र इँटाको रोलिङग गर्ने काम बाँकी छ,” उनले भने, ‘‘पोखरी निर्माणको काम ६० प्रतिशत सम्पन्न भएको छ ।’’ 

पुरातात्त्विक तथा ऐतिहासिक सम्पदालाई पुरानै शैलीमा निर्माण गर्दा त्यही अनुरुपको सामग्री समयमै नपाउँदा समस्या भए पनि सीप र दक्ष जनशक्तिकोे अभाव भने नभएको बताए । 

रानीपोखरी पुनर्निर्माणका लागि भक्तपुरको दक्षिण बाराही इँटा उद्योग र चन्द्रा गिरी नगरपालिका एरिया भित्रको इँटा प्रयोग गरिएको छ भने पोखरीभित्र प्रयोग हुने कालो माटो भक्तपुर, तथा साँखुबाट ल्याउँनेक्रम जारी छ ।

पानीका लागि डिप बोरिङ

रानीपोखरीमा पानी जम्मा गर्नका लागि पोखरीको उत्तर र दक्षिणकुनामा दुईवटा डिप बोरिङ खन्न थालिएको छ ।

रानीपोखरीको निर्माणका लागि उपभोक्ता समितिले ९ करोड ५४ लाख र मन्दिरसहित अन्य सबै निर्माणका लागि सीएम जेभीले साढे १४ करोड रुपैयाँमा जिम्मा लिएको हो । पानी संरक्षणका लागि हाल सानो पोखरीमा पानी जम्मा गर्ने काम जारी रहेको छ । 

पोखरी साढे पाँच फिटको हुनेछ । पोखरीको पर्खालभित्रको क्षेत्रफल ६३ रोपनी हरेको उपभोक्ता समितिले जानकारी दिएको छ ।