काठमाडौं । सडक किरानामा केही बहुमूल्य वस्तु हराए झै फोहोर पानीमा हात डुबाएर खोज्दै गरेका चन्दनलाल मडारीले विगतदेखि नै यस्तै काम गर्दै आएका छन् । उनले फोहोर पानीमा सामान हराएर खोजी गरेका भने होइनन् । यो त उनको जीविकोपार्जनको दैनिकी हो । विगत दुई वर्षदेखि परिवारसहित नेपाल आएका मडारीले आफूले बाल्यकालदेखि नै यस्तै काम गर्दै आएको बाह्रखरीलाई  बताए ।

“बाल्यकालदेखि नै मैले यो काम गर्दै आएको छु, नेपालमा पनि विगत दुई वर्षदेखि यही काम गर्दै छु,” उनले भने, “मेरो ६ जनाको परिवार छ सबैजना यही काम गर्छौं ।”

मडारी परिवारले हालसम्म बागमती खोलाको पशुपति क्षेत्र, चाबहिल, गौशाला, कालीमाटी, कलंकी र न्युरोड लगायतका ठाउँमा सुन खोज्ने काम सकेका छन् । सडकको दायँबाँया जमेको फोहोर पानीमा उनीहरूले पानी हाल्दै ब्रस लगाएर मेहनतको साथ काम गर्छन् । उनका अनुसार माटोमा टाँसिएर रहेका विभिन्न फलाम, पित्तल, तामासँगै सुनचाँदी समेत भेटिने गरेको छ ।

दैनिक २ देखि ४ लालसम्म सुन भेट्न सकिने बताएका मडारीले सुन पसलेले एक लाल सुनको मूल्य पाँच सय रुपैयाँ दिने गरेको बताए । त्यसैगरी, सुनचाँदी बाहेक फेला परेका फलाम लगायतका धातुलाई कवाडीलाई बेच्ने गरेका छन् । “म आफ्नो कामप्रति पूर्ण सन्तुष्ट छु,” उनले भने ।