काठमाडौं । चीनमा रहेका नेपालीका अभिभावकहरुले आफ्ना छोराछोरीलाई चाँडो उद्धार गरेर फिर्ता ल्याउन माग गरेका छन् ।

अभिभावकहरुले बिहीबार स्वास्थ्य राज्यमन्त्री नवराज रावतलाई भेटेर आफ्ना छोराछोरालाई उद्धार गरेर फिर्ता ल्याएर ज्यान बचाइ दिन माग गरेका हुन् । उनीहरुले राज्मन्त्री रावतलाई सात बुँदे ज्ञापनपत्रसमेत बुझाएका छन् । 

केही समयअघि राज्यमन्त्री रावतलाई भेट्‍न नपाएको भन्दै मन्त्रालय अगाडि धर्ना दिएका थिए । यसअघि धर्नामा बसेका अभिभावहरुले सरकारसँग प्रश्‍न गरे, "प्रधानमन्त्री बालुवाटार बसेर बाँसुरी बजाउने अनि हाम्रा छोराछोरीले मृत्यु कुर्दै रोएर बस्‍नुपर्ने हो ?"

धर्ना पछि राज्यमन्त्री रावतले उनीहरुलाई भेट्‍न समय दिएका हुन् । उनीहरुले चाँडो आफ्ना छोराछोरीलाई चाँडो फिर्ता ल्याएर ज्यान बचाउन माग गरेका छन् । मन्त्रीसँगको भेटका क्रममा उनीहरुले आफ्ना छोराछोरी कोठामा थुनिएर रहेको र कुहिएको खानेकुरा खानुपर्ने बाध्यता भएको गुनासो गरे । 

सरकारले भने उनीहरुलाई उद्धार गरेर ल्याएर राख्‍ने ठाउँ नभएकोले ढिलाइ भएको बताएको थियो । अभिभावकहरुले भने आक्रोशित हुँदै आफ्ना छोराछोरीलाई नेपाल ल्याएर आए टुँडिखेलमा राख्‍न तयार भएको बताएका छन् । स्वास्थ्य राज्यमन्त्रीसँगको भेटमा एकजना अभिभावक दिनेश श्रेष्ठले भने, "सरकारले किन कानमा तेल हालेर बसेको छ । हाम्रो छोराछोरीलाई फिर्ता ल्याइदेओस् । हामी टुँडिखेलमा राख्‍न तयार छौं ।" 

स्वास्थ्य तथा जनसंख्या मन्त्रालयका प्रवक्ता महेन्द्र श्रेष्ठले स्वास्थ्य मन्त्रालय तयारी अवस्थामा रहेको छ, सरकारले ल्याउनुभने बित्तिकै ल्याउने बताए । 

यसअघि सरकारले चीनबाट नेपाल ल्याइएकाहरुलाई क्‍वारेन्टाइनका लागि राख्‍ने विभिन्‍न चारवटा ठाउँहरु हेरेको थियो । तर, त्यस विषयमा उक्त ठाउँका स्थानीयले विरोध गरेका छन् ।

चीनको वुहानमा कोरोनाको महामारी फैलिएको छ । त्यहाँबाट स्वदेश फर्किन १८० नेपालीले फाराम भरेका छन् । 

चीनमा कोरोनाका कारण १६३ जनाको मृत्यु भइसकेको छ भने २८ हजारभन्दा बढीमा संक्रमण फैलिएको छ । 

यसअघि चीनबाट नेपाल आएका एकजनामा कोरोनाको संक्रमण भएको स्वास्थ्य तथा जनसंख्या मन्त्रालयले पुष्टि गरेको थियो ।