काठमाडौं । सिंगापुरमा आगामी शुक्रबारबाट तीन राष्ट्र सम्मिलित त्रिकोणात्मक टि –ट्वान्टी क्रिकेट सिरिज सुरु हुँदैछ । सिरिज नेपालका लागि अवसर र चुनौती दुवै बन्नसक्छ । एसोसिएट राष्ट्रको बलियो एसियाली टोली मानिएको नेपालले सिरिजमा सिंगापुर र जिम्बाब्वेसँग दुई–दुई खेल खेल्नेछ ।

राउन्ड रोबिनमा हुने सिरिजमा नेपालले शुक्रबार टेष्ट मान्यता प्राप्त राष्ट्र जिम्बाब्वेसँग खेल्दै प्रतियोगिताको सुरुवात गर्नेछ । सिंगापुरसँग उमेर समूहसँगै सिनियर टोलीसँग पनि खेलिसकेको नेपालका लागि जिम्बाब्वेविरुद्धको खेल नयाँ अवसरसँगै चुनौती पनि हुनेछ । नेपाली खेलप्रेमी र खेलाडी जिम्बाब्वेविरुद्धको खेल हेर्न आतुर छन् । 

पटक–पटक एकदिवसीय विश्वकप खेलिसकेको जिम्बाब्वेविरुद्धको खेल विश्व क्रिकेटमा नेपालको नयाँ फड्को हुनसक्छ । नेपाली टोलीमा अधिकांश नयाँ र युवा अनुहार छन् भने जिम्बाब्वेसँग अनुभवी खेलाडी । नेपाली युवा टोलीले आफ्नो उत्कृष्ट खेल कौशल प्रदर्शन गर्न सके नयाँ इतिहास बन्नसक्छ ।

नेपाल र जिम्बाब्वेको इतिहास

जिम्बाब्वे टेष्ट मान्यता प्राप्त राष्ट्र हो । नेपालले हालसम्म टेष्ट मान्यताप्राप्त राष्ट्रसँग एकमात्र खेल खेलेको छ । नेपालले पहिलो खेल सन् २०१४ मा टि–ट्वान्टी विश्वकपमा बंगलादेशविरुद्ध खेलेको थियो । 

त्यसपछि नेपालले टेष्ट मान्यताप्राप्त राष्ट्रविरुद्ध एकदिवसीय र टि–ट्वान्टी खेल खेल्न पाएको छैन । जिम्बाब्वेसँगको खेल टेष्ट राष्ट्रविरुद्ध नेपालको दोस्रो खेल हुनेछ । यसअघि २०१८ को मार्च ४ मा आईसीसी विश्वकप छनोटमा नेपाल र जिम्बाब्वेबीच प्रतिस्पर्धा भएको थियो । 

उक्त खेलमा नेपाल १ सय १६ रनले पराजित भएको थियो । ५० ओभरको खेलमा जिम्बाब्वेले नेपालसामु ३८१ रनको लक्ष्य प्रस्तुत गरेको थियो । जवाफले नेपालले ५० ओभरमा ८ विकेट गुमाउँदै २६४ रन बनाएको थियो । 

जिम्बाब्वेविरुद्ध जित निकाल्न नसके पनि नेपालले गरेको ब्याटिङको प्रशंशा भएको थियो । त्यो खेलमा नेपालका लागि कप्तान पारस खड्काले ४० रन बनाउँदा ज्ञानेन्द्र मल्लले ३२ आरिफ शेख ५०, शरद भेषावकर ५२, दिपेन्द्र ऐरी २३ र रोहित पौडेलले ३० रन जोडेका थिए ।

त्यो एकदिवसीय खेल भए पनि टि–ट्वान्टी क्रिकेटमा भने नेपालले पहिलोपटक जिम्बाब्वेको सामना गर्दैछ । सिरिजका लागि मुख्य प्रशिक्षक उमेश पटवाल र कप्तान पारस खड्काले एक साताअघि युवा टोलीलाई समेट्दै टोली घोषणा गरिसकेका छन् । युवा टोलीबाट गतिलो प्रदर्शनको अपेक्षा राखेका कप्तान खड्का नयाँ इतिहास बनाउन चाहन्छन् ।

त्यसो त नेपाली टोलीलाई टेष्ट राष्ट्र जिम्बाब्वेसँग जित निकाल्ने अवसर पनि छ । किनकी जिम्बाब्वेका तीन महत्वपूर्ण खेलाडी टोलीमा छैनन् । 

टि–ट्वान्टी क्रिकेटमा जिम्बाब्वेका लागि सर्वाधिक १६ सय ६२ रन बनाएका कप्तान हामिल्टन माजाकाड्जाले यसै साता संन्यासको घोषणा गरिसकेका छन् । आफ्नो क्रिकेट करिअरको अन्तिम खेलमा सर्वाधिक ७१ रन बनाएका उनले अफगानिस्तान र बंगलादेशविरुद्धको त्रिकोणात्मक टि–ट्वान्टी सिरिजबाट संन्यास लिए । उनको संन्याससँगै जिम्बाब्वेले नयाँ कप्तान बनाउनेछ । 

अरु खेलाडी पनि टोलीबाट बाहिरिएका छन् । नेपाली क्रिकेटको अभिभावक संस्था नेपाल क्रिकेट संघ (क्यान) जस्तै जिम्बाब्वे पनि निलम्बनमा छ । निलम्बनसँगै पछिल्लो समयको प्रदर्शन हेर्ने हो भने कमजोर अवस्थामा रहेको जिम्बाब्वेविरुद्ध नेपाललाई इतिहास बनाउने अवसर छ । 

जिम्बाब्वेको यात्रा

सन् १९९२ मा पहिलो पटक टेष्ट मान्यता पाएको जिम्बाब्वेको प्रदर्शन खराब छ । टेष्ट मान्यतापछि त्यहि वर्षको अक्टोबरमा भारतसँग पहिलो टेष्ट खेलेको जिम्बाब्वेले १९९५ सम्म ३० टेष्टमा मात्र एउटामा खेलमा जित निकालेको थियो ।

त्यसपछि लामो समय टेष्टमा नरहेको जिम्बाब्वे २०१० देखि २०१३ सम्म लयमा फर्कियो । आर्थिक समस्यामा पिल्सिएको जिम्बाब्वेले बंगलादेशमाथि १ सय ३० रनको जित निकालेको थियो । हाल टेष्ट बरियतामा जिम्बावे ९ औं स्थानमा छ ।

एकदिवसीय मान्यता प्राप्त नेपालले टेष्ट राष्ट्र जिम्बाब्वेसँग जित निकाले नेपाली क्रिकेटमा ऐतिहासिक जित हुनेछ । टि–ट्वान्टी क्रिकेटमा जिम्बाक्वेको गतिलो प्रभाव छैन । अहिलेसम्मको ७० अन्तर्राष्ट्रिय टि–ट्वान्टी खेलमा जिम्बाब्वे १५ मा विजय हासिल गरेको छ भने ५३ खेलमा पराजित छ । २ खेल भने टाइ भएको थियो । हालै बंगलादेश र अफगानस्तान आबद्ध त्रिकोणात्मक टि–ट्वान्टी सिरिजमा पनि जिम्बाब्वेको गतिलो प्रदर्शन हुन सकेन ।