काठमाडौं । साहित्यकार अमर न्यौपानेले निर्देशक प्रदीप भट्टराईलाई नेपालको राजकुमार हिरानी भनेका छन् । प्रदीप भट्टराई निर्देशित चलचित्र ‘जात्रै जात्रा’ हेरेपछि साहित्यकार न्यौपानेले भट्टराईलाई भारतीय चलचित्र उद्योगमा सफल निर्देशक राजकुमार हिरानीसँग तुलना गरेका हुन् ।

“यस (जात्रै जात्रा) फिल्मका लेखक तथा निर्देशक प्रदीप भट्टराई त मलाई नेपालका राजकुमार हिरानी जस्तो लाग्यो । अर्गाग्यानिक कथामा सन्तुलित मसला हालेर गम्भीर विषयलाई हाँस्यचेत दिन खप्पिस,” भन्दै उनले आफ्नो फेसबुक पेजमा लेखेका छन्, “यो फिल्म आज हेरेँ । धित मरेको छैन, फेरि हेर्छु ।”

देशको समसामयिक विषयलाई हाँस्य माध्यमबाट तीखो व्यङग्य प्रहार गरेको उल्लेख गर्दै लेखेका छन्, “देशमा पनि सुनको कथा, फिल्ममा पनि सुनकै कथा । देशमा केही ठूला माछा र साना माछाले सुनको कथा प्रस्तुत गरे । साना माछा देखिए या देखाइएस ठूला माछा भने लुके या लुकाइए । देखिनु पर्ने ठूलो होस छोपिने पर्ने सानो हो । तर राजनीतिमा ठूला छोपिन्छन्स साना देखिन्छन् । जात्रैजात्रामा भने ठूलासाना सबै देखिन्छन् । यसमै मजा छ ।”

जात्रैजात्राको सबैभन्दा ठूलो शक्ति भनेकै वैचित्र्यपूर्ण संवाद र कथामा दर्शकले नसोचेका ट्वीस्टहरु हुनु भन्दै न्यौपाने अगाडि लेख्छन्, “धेरैजसो संवादले एउटै मात्र अर्थ बोक्दैनन् । ती व्यञ्जनात्मक छन् । पात्रहरुको अभिनय अब्बल छ । पात्रहरुले संवाद जिब्रोबाट होइन जीवनबाट बोलेजस्तो लाग्छ । अभिनय गरे जस्तो लाग्दैन, जीवन बाँचे जस्तो लाग्छ ।”

प्रदीप भट्टराई निर्देशित चलचित्र ‘जात्रै जात्रा’ गत शुक्रबारबाट प्रदर्शन भइरहेको छ । चलचित्रमा विपीन कार्की, रविन्द्रसिंह बानियाँ, रविन्द्र झा, दयाहाङ राई, वर्षा राउतलगायत कलाकारको अभिनय छ ।