काठमाडौं । राजधानी काठमाडौंलाई अपराधमुक्त बनाउने भन्दै प्रहरीले काठमाडौंका सबै घरधनी र डेरावालाको विवरण संकलन गर्ने अभियान सुरु गरेको छ ।  काठमाडौंमा रहेका सबै वृत्त र प्रभागहरुको नेतृत्वमा काठमाडौं प्रहरीले विवरण संकलन अभियान सुरु गरिएको परिसर काठमाडौंका एसएसपी वसन्त लामाले जानकारी दिए । 

लामाका अनुसार सुमदाय–प्रहरी साझेदारी कार्यक्रम अन्तर्गत हालसम्म २६ हजार बढी घरधनी र भाडावालको विवरण संकलन गरिएको छ । काठमाडौंमा ५ देखि ६ लाख घरधुरी भएको प्रहरी अनुमान छ । यो अभियान तत्कालीन काठमाडौं प्रहरीका एसएसपी विश्वराज पोखरेलले पनि सुरु गरेका थिए । 

सबै घरधनी र भाडावालको विवरण संकलन गर्न अझै ३ महिना लाग्नसक्ने एसएसपी लामा बताउँछन् ।  विवरण संकलन गर्नका लागि विभिन्न सरोकारवाला निकायले सहयोग समेत गरेका छन् । काठमाडौं जिल्लामा मात्रै रैथाने र बाहिरबाट आएका गरी झण्डै ३० लाख मानिसको बसोबास रहेको अनुमान छ । 

त्यस्तै, दुईपांग्रे र चारपांग्रे गरी करिब १० लाख सवारीसाधन काठमाडौंका सडकमा गुड्छन् । चाहिएको सबै सूचना तत्काल प्राप्त गर्न सकिने र को–कहाँ बस्छ भन्ने सूचनाले प्रहरीलाई सुरक्षा प्रबन्धका लागि सहज हुने परिसर काठमाडौंका एसएसपी लामाको बुझाइ छ । 

उनका अनुसार घरधनीको विवरणसँगै डेरामा बस्नेको नागरिकता नम्बरदेखि सवारी साधनको नम्बरसमेत प्रहरी कार्यालयमा घरधनीले प्रहरीलाई उपलब्ध गराउनुपर्नेछ । प्रहरीले सबै घरधनीलाई एउटा फारम उपलब्ध गराउनेछ । फारममा सुरुमा घरधनीको विवरण उल्लेख गर्नुपर्नेछ । जसमा टोल, मार्ग, वडा, नागरिकता नम्बर, जिल्ला सबै विवरण भर्नुपर्नेछ । त्यसपछि घरभाडामा बस्नेहरुको सम्पूर्ण विवरण पनि घरधनीले नै भर्नुपर्नेछ । जसमा नाम, बोलाउने नाम, स्थायी ठेगाना, पेशा व्यवसाय, उमेर, सवारीसाधन भए त्यसको नम्बर उल्लेख गर्नुपर्नेछ । 

एसएसपी लामाका अनुसार कतिपय जिल्लाबाट भागेर आएका अपराधीको विवरण प्रहरीसँग हुन्छ ।  घरधनीले दिएको विवरणबाट त्यो पनि खुल्न सक्छ । काठमाडौंमै पनि प्रहरीले धेरैलाई खोजिरहेको हुन्छ, यस्तो अवस्थामा विवरणबाट अपराधीको सम्पूर्ण सूचना प्रहरीसम्म पुग्ने लामा बताउँछन् । 

हाल काठमाडौंमा ३३ सय प्रहरी कार्यरत छन् । कम जनशक्तिले धेरै सुरक्षा धान्नुपर्ने अवस्थालाई यो विवरणपछि सहज हुने प्रहरी दाबी छ । 

प्रत्येक घरमा एसएसपीको नम्बर

विवरण संकलनसँगै प्रहरीले काठमाडौंका प्रत्येक घरमा महानगरीय प्रहरी परिसका प्रमुख एसएसपी, विभिन्न वृत्तका प्रमुखलगायतको नम्बर पनि टाँस्न थालेको छ ।  लामा भन्छन,‘‘कुनै असहजता भएमा जनताले सीधै प्रहरी प्रमुखलाई पनि फोन गर्न सक्नेछन् । सबैको नम्बर भएको स्टीकर हामीले घरभित्र सबैले देख्ने स्थानमा टास्छौं ।’’ 

अब स्थानीयले १०० नम्बरमा मात्र होइन सीधै काठमाडौं प्रहरी प्रमुखसँग आफ्नो गुनासो र समस्या राख्न सक्नेछन् । लामा भन्छन्,‘‘कुनै अपराधको जानकारी भएपनि फोन गर्न सकिनेछ । त्यसको गोप्यता कायम रहन्छ ।’’ घरधनीले बुझाएको विवरण पनि गोप्य रहने उनले बताए ।

फाइल तस्बिर