जनकपुर । धार्मिक पर्यटनमा कहलिएको जनकपुरधाम । यसका धार्मिक र सांस्कृतिक महत्वबारे अधिकांश जानकार छन् । राजा जनकको राजधानी जनकपुर यसरी कहलिनुका प्रमुख कारणमा टिकमगढकी महारानीले ९ लाखमा निर्माण गरिदिएको कलात्मक जानकी मन्दिर पनि एक हो । 

पछिल्लो पटक जनकपुरको पर्यटकीय सौन्दर्यमा खासै सुधार नआए पनि पर्यटक आकर्षित गर्न र पाहुनालाई उत्कृष्ट सेवा दिन राम्रा होटल निर्माण भइरहेका छन् । । तीन दशकअघि एकाध संख्यामा होटल थिए तर, अहिले तारेस्तरका होटल सञ्चालन भएका छन् । 
यही भीडमा आफ्ना भिन्ने पहिचान बनाउँदै अगाडि आएको छ– जनकपुर जिरो माइलस्थित होटल सीताशरण । 

यस क्षेत्रको पर्यटकीय विकासमा समेत टेवा पुगोस् भन्ने हेतुले गैरआवासीय नेपाली (एनआरएन) बैद्यनाथ शर्मा ‘हिरा’ ले यो होटल स्थापना गरेका हुन् ।

२०७१ वैशाख १९ बाट सञ्चालनमा आएको सीताशरणले जनकपुरमा रहेको सुविधासम्पन्न होटल अभावको चर्चामाथि पूर्णविराम लगाइदिएको होटलमै बसिरहेका एक पर्यटकले बताए । शर्माले करिब २५ करोड लगानी गरी होटल स्थापना गरेका हुन् । 

होटलका महाप्रबन्धक कमल सिंहका अनुसार ४० देखि ५० कर्मचारी कार्यरत छन् । अधिकांश सुदूरपश्चिमका र सबै होटल व्यवस्थापनमा पोख्त छन् । जनकपुरमा उल्लेख्य संख्यामा भारतीय पर्यटक आउने गरेका कारण सीताशरणमा पनि भारतीय नै बढी हुने गरेका छन् । त्यसबाहेक तेस्रो मुलुकका पर्यटक पनि आउँछन् । ‘हाम्रो होटलमा अमेरिका, चीन, बेलायतजस्ता देशका पर्यटक पनि आइरहेका हुन्छन्,” उनले भने ।

जनकपुर भारतीय पर्यटकको तीर्थाटनको एक केन्द्रसमेत भएकाले विशेष चाडपर्वमा भक्तको भीड हुने गर्छ । विवाह पञ्चमी, रामनवमीलगायत पर्वका बेला जनकपुरमा मेला लाग्दै आएको र यसमा भारतीय पर्यटकको उपस्थिति व्यापक हुने गरेको छ । यस्ता धार्मिक अवसरमा पनि होटलले ग्राहकलाई सेवा दिँदै आएको सिंहले बताए । “पाहुनालाई सन्तुष्ट तुल्याउने गरी सेवा दिन दत्तचित्त भएर लागेका छौं,” उनले भने । 

उनका अनुसार जनकपुर क्षेत्रलाई केन्द्रित गरी हुँदै आएको सरकारी, गैरसरकारी संस्थाका सभा, सम्मेलन, गोष्ठी, बैठक, साधारणसभा आयोजना गर्न सीताशरण उपयुक्त रहँदै आएको छ । यसका साथै होटलमा रेस्टुरेन्ट, ब्यांक्वेट पनि छन् । होटललाई कलात्मक चित्रले सिँगिरिएको छ ।  

सीताशरण एकतारे स्तरको भए पनि तीनतारे स्तरको सुविधा दिँदै आएको महाप्रबन्धक सिंहले जानकारी दिए । सीताशरणमा वार्षिक २ हजारभन्दा बढी पाहुना आउने गरेको तथ्यांक छ । होटलमा हाल ३६ सुविधासम्पन्न कोठा छन् जसमा ७२ बेड छन् ।

होटलले टुर प्याकेजको व्यवस्था पनि गरेको छ । जनकपुर धार्मिक क्षेत्र भएको र यसवरपर पनि केही धार्मिक स्थल रहेकाले ती स्थान भ्रमणको व्यवस्था पनि सीताशरणले मिलाउँदै आएको छ । जनकपुरवरिपरिका मटिहानीजस्तो पुरातात्विक तथा ऐतिहासिक स्थल, धनुषाधाम, जलेश्वरनाथ जस्ता धार्मिक महत्वका पोखरीले यस क्षेत्रलाई थप आकर्षक बनाएका छन् । त्यसैले पनि प्याकेज टुर व्यवस्था गरिएको सिंहले बताए ।

धार्मिक र पुरातात्विक दृष्टिकोणबाट उत्कृष्ट मानिए पनि भौतिक संरचना निर्माणमा देखिएको उदासिनताका कारण जनकपुर सोचेजति सुन्दर देखिँदैन ।  जनकपुरको विकास गर्न स्थानीय निकाय तथा प्रदेश सरकारले विभिन्न काम अगाडि बढाएका कारण अब यहाँ आन्तरिक तथा वाह्य पर्यटक बढ्दै जाने व्यवसायीको भनाइ छ ।

सीताशरणका सञ्चालक सदस्य साकेत शर्मा ‘मुरारि’ का अनुसार सीताशरण समूहले निकट भविष्यमै जनकपुरको शिवचोकमा २२ बेड क्षमातयुक्त सीताशरण होटल एन्ड प्लाजा सञ्चालनमा ल्याउन लागेको छ । “जनकपुर आउने आन्तरिक तथा वाह्य पर्यटकलाई गुणस्तरीय सेवा दिने उद्देश्यले केही महिनाभित्रै नयाँ होटल सञ्चालनमा ल्याउँछौं,” उनले भने, “यसमा सबैको साथ र सहयोग मिल्ने विश्वास छ ।”