काठमाडौं । नेपाल वायुसेवा निगमले बाँकी रहेका ४ वटा चिनियाँ जहाज खरिद प्रक्रिया अघि बढाएको छ । संस्कृति, पर्यटन तथा नागरिक उड्डयन मन्त्रालयले निगमलाई पत्र काटेपछि निगमले खरिदको प्रक्रिया अघि बढाएको हो । निगमले यसअघि दुईवटा चिनियाँ जहाज ल्याइसकेको छ ।

सरकारले यसअघि ल्याएको चिनियाँ जहाज निगमलाई ‘सेतो हात्ती’ बनिरहेकै बेला थप ४ वटा जहाज ल्याउने तयारी थालेको हो । “मन्त्रायलबाट जहाज खरिद प्रक्रियाका लागि पत्र आएको छ,” निगम स्रोतले बाह्रखरीसँग भन्यो, “मन्त्रालयको पत्रअनुसार निगमले पत्र काटेको हो ।”

पर्यटनमन्त्री जीवनबहादुर शाहीले केही दिनअघि नागरिक उड्डयन प्राधिकरण र निगमलाई तत्काल जहाज खरिद प्रक्रिया अघि बढाउन निर्देशन दिएका थिए । प्राधिकरणबाट मिलाउनुपर्ने प्राविधिक कुरा तत्काल समाधान गर्न र निगमलाई आन्तरिक रूपमा तयारी गर्न निर्देशन दिएका थिए ।