एजेन्सी । विश्व नम्बर एक स्विस खेलाडी रोजर फेडेरर इन्डियन वेल्स मास्टर्सको सेमिफाइनलमा प्रवेश गरेका छन् । शुक्रबार भएको क्वाटरफाइनलमा कोरियन खेलाडी चुङ हेयनलाई हराउदै फेडेररले सेमिफाइनलमा स्थान पक्का गरेका हुन् ।
क्यालीफोर्नियामा भएको खेलमा फेडेररले २३ औं वरियताका हेयनलाई ७ – ५ र ६ – १ को सेटमा पराजित गरे । योसँगै ३६ बर्षिय फेडेररले ११ औं पटक इन्डियन वेल्सको सेमिफाइनलमा स्थान बनाए । कीर्तिमानी २० औं पटकको ग्राण्डस्लाम च्याम्पियन फेडेररले पाँचौ पटक इन्डियन वेल्सको उपाधि जितिसकेका छन् ।
फेडेररले अब फाइनल प्रवेशको लागि क्रोएसियाका बोर्ना कोरिकसँग खेल्ने छन् । कोरिकले क्वाटरफाइनलमा दक्षिण अफ्रिकाका केभिन एण्डरसनलाई २ – ६, ६ – ४, ७ – ६ (७ – ३ ) ले हराउदै फेडेररसँगको भेट पक्का गरे ।
बीएनपी परिबास ओपनले चिनिने इन्डियन वेल्स अन्तर्गत नै महिलातर्फ अमेरिकी भेनस विलियम्सले सेमिफाइनलमा स्थान पक्का गरेकी छिन् । क्वाटरफाइनलमा भेनसले स्पेनकी कार्ला स्वारेज नभारोलाई पराजित गरिन् ।
भेनसले नभारोमाथि ६ – ३ र ६ – २ को सेटमा हराएकी थिइन् । ३७ बर्षिय भेनसले अब फाइनल प्रवेशको लागि रसियन डारिया कासतकिनोसँग खेल्ने छिन् ।