काठमाडौं । नेकपा (एकीकृत समाजवादी) का सम्मानित नेता एवं पूर्वप्रधानमन्त्री झलनाथ खनालले पार्टीले सरकार छोड्ने निर्णय नगरेको बताएका छन् ।

पार्टीको आसन्न राष्ट्रिय महाधिवेशनमा प्रस्तुत हुने दस्ताबेजबारे छलफलका लागि सोमबार आयोजित पार्टीको पोलिटब्युरो बैठकपछि सञ्चारकर्मीहरूको जिज्ञासामा नेता खनालले पार्टीको राजनीतिक प्रतिवेदनमा पनि सरकार छाडने कुरा उल्लेख नभएको स्पष्ट पारे ।

उनले पार्टीको राष्ट्रिय महाधिवेशनमा पेस हुने राजनीतिक प्रतिवेदनमाथि मंगलबारदेखि सुरु हुने पार्टी केन्द्रीय कमिटी बैठकमा थप छलफल हुने बताए ।

एकीकृत समाजवादीको केन्द्रीय कमिटीको बैठक मंगलबारदेखि ललितपुरको कान्तिपुर गार्डेनमा बस्दै छ । दुई दिनसम्म चल्ने बैठकमा महाधिवेशनमा प्रस्तुत हुने राजनीतिक प्रतिवेदन, सांगठनिक प्रतिवेदन, पार्टीको समाजवादी कार्यक्रम र विधान संशोधनका विषयमा छलफल गरी टुंगो लगाउने नेता खनालले बताए ।

एकीकृत समाजवादीको महाधिवेशन आगामी असार १६ देखि २० गतेसम्म काठमाडौंमा हुँदै छ ।