राजनीति
काठमाडौं । नेपाली कांग्रेसका केन्द्रीय सदस्य एवम् पूर्वअर्थमन्त्री डा. रामशरण महतले सरकारसँगै कर्मचारी पनि सरुवा हुँदा विकास निर्माणमा विनियोजित बजेटबाट समयमै काम गर्न नसकिएको बताएका छन् ।
नेपाली कांग्रेस नवलपरासीले गरेको कार्यक्रमलाई सम्बोधन गर्दै उनले राष्ट्रसेवक कर्मचारी राजनीतिबाट मुक्त रहनुपर्ने बताए ।
उनले कर्मचारीले राजनीति गर्दा जनतालाई मर्का पर्ने धारणा समेत राखे । डा. महतले स्थानीय निकायको पुनःसंरचना गरेर जाँदा ढिला हुने भएकाले अहिलेकै संरचनामा स्थानीय निकायको निर्वाचन हुनुपर्ने धारणा राखे ।
उनले विगतमा कांग्रेसले लिएको आर्थिक नीतिकै कारण मुलुक अहिले विकासको चरणमा प्रवेश गरेको बताए । कार्यक्रममा कांग्रेस केन्द्रीय सदस्य देवेन्द्रराज कँडेलले प्रदेशको संरचनामा नवलपरासीलाई टुक्र्याइएको भन्दै विरोध जनाए । कांग्रेस सांसद रन्जित कर्णले अख्तियारले छानविन प्रक्रिया अघि बढाउन थालेको आशंकामा बामपन्थी पार्टीहरु तर्सेर महाभियोग प्रस्ताव ल्याएको बताए । उनले गलत गर्नेलाई कारवाही गरिनुपर्ने भए पनि यसका बारेमा पार्टीले गम्भीर भएर निर्णय लिनुपर्ने धारणा राखेका थिए ।
कार्यक्रममा कांग्रेस नेताहरु रमेश महत, हिमालदत्त श्रेष्ठ, खेलराज पाण्डे लगायतले धारणा राखेका थिए ।
प्रकाशित मिति: शुक्रबार, कात्तिक १२, २०७३ १८:४३
प्रतिक्रिया दिनुहोस्