राजनीति
काठमाडौं । नयाँ सरकार गठनपछि प्रमुख दलका शीर्ष नेताबीच पहिलोपटक संविधान संशोधनसहित महत्वपूर्ण विषयमा छलफल भएको छ । प्रधानमन्त्रीको हैसियतमा पुष्पकमल दाहाल प्रचण्डले बोलाएको बैठकमा पहिलोपटक पुगेका नेकपा एमालेका अध्यक्ष केपी शर्मा ओलीले बैठकपछि पत्रकारहरुसँग कुरा गर्दै चारवटा महत्वपूर्ण विषयमा कुराकानी भएको बताए ।
“बैठकमा चारवटा विषयमा छलफल भयो,” एमाले अध्यक्ष ओलीको भनाई थियो, “संविधान कार्यान्वयन, संविधान संशोधन, महाभियोग र निर्वाचन सम्बन्धी चारवटा विषयमा छलफल भयो । यो छलफलको सुरुवात हो ।त्यसैले कुनै निश्कर्षमा पुगिएको छैन ।”
बैठकपछि नेपाली कांग्रेसका सभापति शेर बहादुर देउवाले संविधान संशोधन गरेर निर्वाचनमा जाने बारेमा छलफल भएको बताए ।
“महाभियोगको बारेमा हाम्रो पार्टीमा छलफल जारी छ,” उनले भने, “निर्वाचनका लागि संविधान संशोधन नगरि हुँदैन । मधेसवादी दलका नेताहरुसँग पनि यसबारेमा छलफल गरेर निष्कर्षमा पुग्छौं ।”
तीन दलका शीर्ष नेताबीच प्रधानमन्त्री निवास बालुवाटारमा करिब एक घण्टा छलफल भएको थियो ।
प्रकाशित मिति: बुधबार, कात्तिक १०, २०७३ १७:३१
प्रतिक्रिया दिनुहोस्