राजनीति
काठमाडौं । राज्य व्यवस्था समितिमा नेपालको परराष्ट्र नीति, उत्तर–दक्षिणमा रहेका सीमा स्तम्भको व्यवस्थापन, बौद्धिक समूहको गठन, स्थानीय तहको निर्वाचनलगायत समसामयिक विषयमा छलफल भएको छ ।
समितिको शुक्रबार बसेको बैठकमा सदस्यहरुले अध्यागमन कार्यालयका काम कारबाहीलाई पनि थप चुस्त र व्यवस्थित गर्नुपर्ने खाँचो औँल्याए ।
लोकसेवा आयोग र नेपाली सेनाबीच देखिएको समस्याको निराकरण, दक्षिण सुडानमा शान्ति स्थापना कार्यमा खटिएका नेपाली सेना बिना राहदानी उडेको घटना, नेपाल–भारत सीमा क्षेत्रमा हुँदै आएको डुबान समस्यालगायत विषयले पनि बैठकमा प्रवेश पाएको थियो ।
संविधानसभाबाट संविधान जारी भएपछिका राजनीतिक घटनाक्रम र संविधान कार्यान्वयमा देखिएका चुनौतीलाई साझा प्रतिबद्धताका साथ निकास दिँदै जानुपर्छ भन्ने विषयमा समेत बैठकमा विस्तृत रुपमा छलफल भएको थियो ।
बैठकमा सांसद यज्ञ सुनुवारले संविधान कार्यान्वयनलाई तीव्रता दिन राज्य पुनःसंरचना र प्रशासनिक पुनःसंरचनालाई तीव्र तुल्याउन, कर्मचारी व्यवस्थापन गर्न, भूकम्पपछिको पुनःनिर्माणमा सबै राजनीतिक दलले एकताबद्ध भएर अगाडी बढ्न आवश्यक रहेको बताए ।
सांसद भीम आचार्यले छिमेकी मुलुकले अपनाएको राजनीतिक र आर्थिक प्रणालीबीचको तादत्म्यताको अध्ययन गर्न आवश्यक रहेको बताउँदै परराष्ट्रनीति र विकास निर्माणमा नेपालका राजनीतिक दल र जनता एकढिक्का हुन आवश्यक रहेको बताए ।
सांसद आनन्दप्रसाद ढुङ्गानाले सरकार फेरिनेबित्तिकै चलाएमान भएजस्तो भान हुने परराष्ट्र नीतिलाई स्थिर तुल्याउन एउटा विद्धत समूह (थिङ्ट्याङ्क) गठन गरी त्यसले दिएको सुझावका आधारमा अघि बढ्न आवश्यक रहेको धारणा राखे ।
सांसद प्रेम सुवालले प्रजातन्त्रका लागि स्थानीय निर्वाचन अनिवार्य सर्त भएकाले यसका लागि दलबीच सहमति कायम गरेर अघि बढ्नुपर्ने आवश्यकता औल्याए ।
बैठकले समितिको कार्यक्षेत्रभित्र रहेको मन्त्रालय र आयोगको अनुगमन तथा निरीक्षणका लागि बनाएको कार्यतालिकालाई स्वीकृत गरेको छ ।
त्यस्तै समितिको वार्षिक प्रतिवेदन तयार गर्न एक उपसमिति गठन गर्ने र उक्त उपसमितिलाई आगामी कात्तिक मसान्तभित्र प्रतिवेदन प्रस्तुत गर्ने कार्यदेश दिने निर्णय समेत बैठकले गरेको छ । रासस
प्रकाशित मिति: शुक्रबार, भदौ ३१, २०७३ १३:४२
प्रतिक्रिया दिनुहोस्