राजनीति
काठमाडौं । नेकपा एमालेले पार्टी नेताहरूको सम्पत्ति विवरण संकलन गर्न सुरू गरेको छ । एमाले पार्टी केन्द्रीय कार्यालय धुम्बाराहीमा भदौ २४ र २५ गते बसेको एमाले अनुशासन आयोगको बैठकले पार्टी पदाधिकारी, केन्द्रीय सदस्य, सांसदहरु, राजनीतिक नियुक्ति पाएका व्यक्तिहरूले सम्पत्ति विवरण बुझाउन निर्देशन दिएको छ ।
अनुसाशन आयोगका सदस्य भोजराज जोशीका अनुसार आयोगले सम्पत्ति विवरण संकलन पार्टी अध्यक्ष केपी शर्मा ओलीबाट सुरु गरेको छ । अनुशासन आयोगको बैठकमा ओलीले आफ्नो सम्पत्ति विवरण बुझाएका छन् । अब अन्य सम्बन्धित व्यक्तिको सम्पत्ति विवरण संकलन सुरु गरी असोज ५ गते देखि सुरु हुने केन्द्रीय कमिटीको बैठकमा यसको प्रतिवेदन बुझाउने जोशीले बताए ।
यसअघि पनि अनुसाशन आयोगले नेताहरूको सम्पत्ति विवरण संकलन गरेको थियो । यसअघि संकलन गरेको सम्पत्ति विवरण र अहिले संकलन गरिने सम्पत्ति विवरणमा असमान्य वृद्धि देखिएमा कारबाहीको सिफारिस गरिने आयोगका अर्का सदस्य अर्जुन राईले जानकारी दिए । उनले भने, “नेताहरुको सम्पत्तिको स्रोत नदेखिएमा, अनपेक्षित सम्पत्ति बढेको पाइएमा छानबिन हुन्छ र गलत ढंगले सम्पत्ति आर्जन गरेको पाइएमा सम्बन्धित व्यक्तिलाई कारबाही गर्न केन्द्रीय कमिटीलाई सिफारिश गरिन्छ ।”
पार्टीभित्र अनुशासन र मर्यादा नभएको भन्दै आयोगको बैठकले पार्टीको आन्तरिक स्थिति नीति र पद्धतिको व्यवहारमा चल्नुपर्ने बताएको छ । बैठकले पार्टीभित्र देखापरेको अनुशासनहीनता, अस्वस्थता, समूहबद्धता र अभिव्यक्तिमा हुने गरेको स्वच्छन्दतालाई नियन्त्रण गर्न पार्टीलाई ध्यानाकर्षण गरेको आयोगले जनाएको छ ।
एमाले स्थायी कमिटीको ३० देखि भदौ ५ गतेसम्म बसेको बैठकले गरेको राष्ट्रिय स्वाधीनता, अखण्डता र स्वाभिमानको रक्षको पक्षमा दृढतापूर्वक उभिने लगायतका ६ बुँदे संकल्पको अनुशासन आयोगले समर्थन गरेको छ ।
प्रकाशित मिति: सोमबार, भदौ २७, २०७३ १८:१४
प्रतिक्रिया दिनुहोस्