जनकपुरधाम । श्रीमतीसँग विवाद हुँदा गोली प्रहार गरेर तर्साउने एक युवक पक्राउ परेको छ । मंगलबार प्रहरीले पेस्तोलसहित जनकपुरधाम उपमहानगरपालिका ९ थापा चोकबाट ३७ वर्षीय मनिषकुमार अधिकारीलाई पक्राउ परेको हो ।

उनले सोमबार राति श्रीमतीसँग विवाद हुँदा गोली प्रहार गरेका थिए । गोली चलेको खबर पाएपछि प्रहरी घटनास्थलमा पुगेको थियो । प्रहरीले उनको घरको भान्छा कोठामा लुकाएर राखेको अवस्थामा पेस्तोल बरामद गरेको छ ।

अटो पिस्टन यूएसए लेखिएको पेस्तोलमा गोली एक राउन्ड र म्याग्जिन बरामद भएको धनुषाका प्रहरी नायव उपरीक्षक प्रदीपबहादुर क्षेत्रीले जानकारी दिए । उनकाअनुसार श्रीमान–श्रीमतीबीच घरायसी विवाद हुँदा घरको छतमा गएर तर्साउनका लागि गोली चलाएको मनिषले प्रहरीसमक्ष बयान दिएका छन् ।

मनिष अहिले धनुषा प्रहरीको हिरासतमा छ । उनीमाथि हातहतियार तथा खरखजाना मुद्दा म्याद थप गरी थप अनुसन्धान भइरहेको छ ।