मस्को । युक्रेनमा हिंसात्मक युद्ध थालेको ४० दिन बितिसक्दा पनि दुवै पक्षबीच जित–हारको फैसला हुन सकेको छैन ।

पश्चिमबाट व्यापक समर्थन पाइरहेको युक्रेन कुनैपनि हालतमा आत्मसमर्पण गर्न चाहँदैन भने रुस पनि पछि हट्न तयार छैन ।

यसैबीच, ६९ वर्षीय राष्ट्रपति भलादमिर पुटिनको एक नयाँ भिडियो सार्वजानिक भएको छ जसले उनको स्वास्थ्य अवस्थाबारे व्यापक बहस सुरु भएको छ । 

गए राति एक चर्चमा भएको इस्टर समारोहमा पुटिन सिधा उभिनै नसकेको, एकदम असहज शैलीमा लगातार ओठ टोकिरहेको अनि उनका हातहरु पनि कामिरहेको देखिएको छ । त्यसैले उनको शारीरिक स्वास्थ्य अवस्थामा केही समस्या आएको हुन सक्ने अनुमान गरिएको छ । 

रुसको टेलिभिजनमा प्रशासरण गरिएको उक्त छोटो फुटेजमा पुटिन पहिलेभन्दा दुब्लाएजस्तो पनि देखिएका थिए । त्यस्तै, एक शीर्ष अधिकारीसँगको बैठकमा उनले एकदम गाह्रो गरी टेबलको छेउ बेस्सरी समातेर बसिरहेको देख्न सकिन्छ । 

यसपछि सामाजिक संजालभरि उनको अवस्थालाई ‘पार्किन्सन्स’ नामक रोगसँग जोडिएको छ । पार्किन्सन्स भनेको मस्तिष्क सम्बन्धी समस्या हो जसले व्यक्तिमा काम्ने, शरीर अठ्ठिने र हिँड्न अनि सिधा उभिन कठिनाइ हुने हुन्छ । प्रायः मानिसहरुमा पार्किन्सन्स एकदम खराब स्तरमा पुगिसकेपछि मात्र यसका लक्षणहरु देखा पर्दछन् । र यसका बिरामीहरुले बिस्तारै हिँड्न र बोल्नमा एकदम कठिन महसुस गर्दै जान्छन् । 

सो समारोहमा पुटिन मस्कोको सेभियर क्याथेड्रलमा शहरका मेयर सेर्गी सोबिआनिनसँग देखा परेका थिए । यसमा उनले एकदम असहज मानिरहेको र लगातार ओठ टोकिरहेको स्पष्ट देख्न सकिन्छ । त्यस्तै उनले बारम्बार माथि तल हेरिरहेको पनि पाइन्छ । यति मात्र नभएर एउटा क्षण्मा त उनले आफ्नो शरीरलाई हलचल गराउन एकदम ध्यानपूर्वक हातखुट्टा यताउती गरिरहेको देखिएको छ । 

पुटिनको यो उपस्थितिलाई अहिलेसम्मकै सबैभन्दा आश्चर्यजनक मानिएको छ । किनकी उनी प्रायः एकदम बलवान स्वरुपमा देखा पर्ने गरेका छन् । यता स्वास्थ्यविद्हरुले पनि उक्त फुटेजमा पुटिन वास्तवमै स्वस्थ अवस्थामा नभएको दाबी गरेका छन् । 

पुटिनको स्वास्थ्य अवस्थाबारे लामो समयदेखि नै विभिन्न अनौपचारिक खबरहरु बाहिर आइरहेको थियो । तर क्रेम्लिनले यस्ता सबै शंकालाई गलत दाबी गर्दै आएको छ । पुटिन आगामी अक्टोबरमा ७० वर्ष पुग्नेछन् । 

यसअघि स्वतन्त्र रुसी मिडिया, प्रोएक्ट मिडियाको अनुसन्धानात्मक रिपोर्टमा मस्कोका युभेजेनी सेलिभेनोभ नामक एक शल्यक्रियाका डाक्टर पुटिनको स्वास्थ्य परीक्षणका लागि ३५ पटक सोचीको रिसोर्टमा पुगेको बताइएको थियो । उनी एक अत्यन्तै प्रतिष्ठित डाक्टर र थाइरोइड क्यान्सरका विज्ञ हुन् । क्रेम्लिनले यसबारे कुनै प्रतिक्रिया जनाएको छैन तर प्रोएक्ट मिडियालाई रुसमा प्रतिबन्धित गराएको छ । द सनबाट