विराटनगर । उर्लाबारी मोरङको दोस्रो प्रमुख सहर हो । बसाइँ सराइका लागि उपयुक्त मानिएको उर्लाबारी पछिल्लो समय घना आवादीयुक्त सहर बनिसकेको छ । राजमार्गको विकाससँगै विस्तार भएको यो सहरको चौकमै पुरानो काठको भुइँतले घर छ । 

कल्पना शाक्यका लागि पछिल्लो चार वर्ष घरको बरन्डा र चौघेरा नै सबैथोक बनिदियो । टोलाएरै धेरैदिन बिताइन् । कति रात अनिँदै बिते । तर, मंगलबार अदालतले गरेको एउटा फैसलाले भने कल्पनालाई अलिकति भएपनि राहत मिल्यो । 

“न्याय मर्दैन भन्ने सुनेकी थिएँ सत्य रेहछ,” उनले भनिन्, “छोरो फर्किएर आउँदैन तर, अपराधीले सजाय पाएको छ ।” 

कल्पना ३३ किलो सुन तस्करी प्रकरणमा हत्या गरिएका सनम शाक्यकी आमा हुन् । सुन गायब गरिदिएको भनेर यातना दिएर सनमको हत्या भयो । तर, न सनमकी आमा कल्पनाले सुनका गहना लगाएकी छन् न उनकी श्रीमती सुनिताले नै ।

मंगलबारको जिल्ला अदालत मोरङको आदेशले ३३ किलो सुन प्रकरण मुद्दामा प्रतिवादीमध्येका मुख्य अभियुक्त मोरङ, उर्लाबारीका गोरे भनिने चूडामणि उप्रेतीसहित ६ जनामाथि जन्मकैदको फैसला सुनाएको छ । 

सोही फैसलाले कल्पना र उनको परिवारलाई अलिकति भएपनि खुसी दिएको हो । “छोरा गुमाउनुको पीडाको भर्पाइ त केहीले पनि हुँदैन नि,” कल्पनाले भनिन्, “हामी न्याय पर्खिएर बसेकका थियौँ । चार वर्षसम्म आँसुको आहालमा डुबेर बसेका थियौँ । अदालतले आज न्याय दिलाइदियो ।” 

प्रहरी प्रशासनले देखाएको तदारुकता र आदलतले दिएको न्यायले आफूहरूलाई थोरै भएपनि सन्तोष मिलेको श्रीमती सुनिताले बताइन् । “श्रीमान बितेपछि जीवन नै अन्योलमा परेको छ । हामी सामान्य रूपमा बस्ने मानिस अपराधीले मेरो घर नै उजाडिदिए,” उनले भनिन, “म जसरी तड्पिएर बसेको छु, अपराधीले पनि त्यसैगरी तड्पिन परोस् । मैले जन्मकैद होस् भन्ने कामना गरेकी थिएँ अदालतले गरिदियो खुसी छौँ ।” 

गोरेले सनमलाई सुनझोडाको जंगलमा तीन दिनसम्म यातना दिएर राखेका थिए । पछि करेन्ट लगाएर उनको हत्या भएको थियो ।
 
सनम घरको मुल आम्दानी गर्ने ‘खम्बा’ थिए । उनको हत्यापछि परिवारलाई घर व्यवहार चलाउन निकै गाह्रो भएको आमा कल्पनाले सुनाइन् । सनमको एक छोरा र एक छोरी छन् । 

यो अवधि सुनिताको लागि निकै कष्टकर बन्यो । एउटा सहकारी संस्थामा जागिर खाएर आउने सीमित आम्दानीले मुश्किलले परिवार चलाइरहेएकी छन् । “दुःख र पीडाको पहाडले थिचेपनि हामी बाँचेका छौँ । हिम्मत हारेका छैनौँ,” उनले भनिन् ।

२०४२ सालमा लिएको १० धुर जग्गा र त्यही जग्गामा बनेको पुरानो घरमा सनमको परिवार बस्दै आएको छ । सनम ढुङ्गाबालुवा गिट्टीको हिसाबकिताब राख्ने काम गर्थे । पछि गोरे आएर काठमाडौंमा आफ्नो कार्यालय रहेको र त्यही ‘कारोबार सम्हालिदेऊ’ भन्दै सनमलाई लगेको सुनिताले सुनाइन् । २०७२ सालदेखि सनम गोरेसँग नजिक भएर काम गर्न थालेका थिए ।