काठमाडौं । नेकपा (एमाले)का अध्यक्ष केपी शर्मा ओलीले वरिष्ठ नेता झलनाथ खनाल र माधवकुमार नेपाल समूहलाई तलैसम्म भूमिकाविहीन बनाउनेगरी कार्यविभाजन गरेपछि पार्टी फुटको घोषणा हुनमात्रै बाँकी छ । 

नेता खनालले केपी शर्मा ओलीको गुटले पार्टीका नेताहरूलाई भूमिकाविहीन बनाउने र स्थायी कमिटीबाट हटाउने अधिकार नराख्ने जिकिर गरेका छन् । पार्टी अध्यक्ष ओलीले दसौँ महाधिवेशन आयोजक कमिटीको बैठक बसेर कार्यविभाजनपछि बाह्रखरीलाई प्रतिक्रिया दिँदै उनले आजको निर्णयको कुनै अर्थ नरहेको बताए ।

“आज बसेको भने ओलीको गुटको बैठक हो । गुट आफैँमा अवैधानिक कुरा हो । अदालतको आदेशअनुरूप नचल्ने कुनै पार्टी हुँदैन,” आफ्नो तर्कमा उभिँदै खनालले भने, “गुटको बैठक राखेर नेताहरूलाई हटायौँ भन्नुको कुनै अर्थ छैन ।”

ओलीको कार्यशैलीले एमाले पुनःगठनको सान्दर्भिकता झन् उचाइमा पुगेको बताए ।

“ओलीले कस–कसलाई कारबाही गरे, के–के निर्णय गरे त्यसको कुनै मूल्य छैन । हामी एमाले पुनःगठन गर्दैछौँ । पुनःगठन अभियान झन् व्यापक बनेर जान्छ । यसले आन्दोलनलाई झन् बलियो बनाउँछ,” उनको जिकिर थियो ।