काठमाडौं । वि.सं. २०६६ साल फागुन १७ गते जनकपुर टुडे संचार गृहका अध्यक्ष तथा पत्रकार अरुण सिंघानियाको हत्या भयो ।

त्यसपछि २०६८ साल जेठमा जनकपुरमा भएको एक बम काण्डमा ५ जनाको मृत्यु भयो । ती दुवै अपराधका नाइके संजय साह ‘टक्ला’ भने २०६४ सालको पहिलो संविधान सभाको निर्वाचनबाट सांसद भइसकेका थिए र दोस्रो संविधान सभामा पनि निर्वाचित भए । निर्वाचित मात्र होइन यिनी मन्त्रीसमेत भएका थिए ।

अहिले जेलमा भएका यी व्यक्ति उपेन्द्र यादवको मधेसी जनअधिकार फोरमबाट सांसद भएका थिए भने पछि राजेन्द्र महतोको सद्भावना पार्टी प्रवेश गरेका थिए ।

त्यसबेलाका यी दुई दल विभिन्न समूहमा मिल्दै अहिले जनता समाजवादी पार्टी बनेका छन् र अहिलेको सत्ता समीकरणको खेलमा यो दल महत्वपूर्ण कडी बन्न गएको छ ।

यो दलले अहिले एक हत्या प्रकरणमा अदालतले दोषी मानेर जेलमा राखेको व्यक्तिलाई मुक्त गर्नुपर्ने शर्त राखेको छ । यस्तो अपराधलाई गलत तरिकाले माफी दिने, अपराध र गलत कार्यलाई प्रोत्साहन दिने राजनीतिको प्रतिवाद गरिनु पर्दछ ।

जनता समाजवादी पार्टीले जेलबाट मुक्त गरिनुपर्ने भनेर माग राखेका व्यक्ति रेशम चौधरी हुन् । यिनी मुख्य योजनाकार मानिएको टीकापुरको २०७२ भदौ ७ गते भएको घटनामा सात प्रहरी  र एक नाबालकको मृत्यु भएको थियो ।

यस्तो अपराधी प्रवृत्तिलाई जसपाले मात्र होइन अन्य राजनीतिक दलले पनि प्रश्रय दिइ आएका छन् । राजनीतिबाट अपराध हटेर जानुपर्नेमा झन् बढेर जानु देश र जनताका लागि प्रत्युत्पादक हुन्छ । हेराैँ यिनै विषयमा केन्द्रित रहेर तयार पारिएको प्रतिवाद कार्यक्रम ।