रुकुमपूर्व । कोरोनाको कुनै लक्षण नदेखिएपछि रुकुमपूर्वको पुथाउत्तरगंगा गाउँपालिकाले १६१ जनालाई घर पठाएको छ ।
कोरोना जोखिम नियन्त्रणका लागि गाउँपालिकाले निर्माण गरेका विभिन्न क्वारेन्टाइनमा बस्दै आएका उनीहरुलाई आज घर पठाइएको हो । दुई सातासम्म क्वारेन्टाइनमा बस्दा कोरोनाको कुनै लक्षण नदेखिएपछि स्वास्थ्य जाँच गरी उनीहरुलाई घर पठाइएको गाउँपालिका उपाध्यक्ष ओमकुमारी शाहीले बताए ।
अध्ययन तथा रोजगारीका सिलसिलामा देशका विभिन्न ठाउँमा पुगेका उनीहरुलाई गाउँपालिकाले उद्धार गरी क्वारेन्टाइनमा राखेको थियो ।
क्वारेन्टाइनबाट घर पठाइए पनि उनीहरुलाई केही समय होम क्वारेन्टाइनमा बस्न भनिएको छ । गाउँपालिकाका अझै पनि धेरै मानिस क्वारेन्टाइनमा छन् । उनीहरुको समयसमयमा स्वास्थ्य जाँच भइरहेको र स्वास्थ्यावस्था सामान्य रहेको गाउँपालिकाले जनाएको छ ।
यसैगरी भूमे गाउँपालिकाले पनि क्वारेन्टाइनमा बसेका २३ जनालाई घर पठाएको छ । देशका विभिन्न जिल्लाबाट आएका उनीहरुलाई विभिन्न ठाउँका क्वारेन्टाइनमा राखिएको थियो ।
क्वारेन्टाइनमा बसेको १४ दिनसम्म संक्रमण नदेखिएपछि आआफ्नो घर पठाइएको गाउँपालिका अध्यक्ष रामसुर बुढा मगरले बताए ।
भूमेले स्वास्थ्यकर्मीलाई जोखिम भत्ता दिने
भूमेले कोरोना कोभिड –१९ को उपचारमा खटिएका स्वास्थ्यकर्मीलाई जोखिम भत्ता सुविधा दिने निर्णय गरेको छ । गाउँपालिकाले कोरोना महामारीको बेलामा भूमेका विभिन्न ठाउँमा रहेर काम गरिरहेका स्वास्थ्यकर्मीलाई जोखिम भत्ता उपलब्ध गराउने भएको हो ।
स्वास्थ्यकर्मीलाई गाउँपालिकाले पहिलेको उनीहरुको तलबको ५० प्रतिशत भत्ता उपलब्ध गराउने भएको गाउँपालिकाका प्रमुख प्रशासकीय अधिकृत चन्द्रसिंह श्रेष्ठले जानकारी दिए ।
सङ्घीय सरकारले नै कोरोनाको उपचारमा खटिएका स्वास्थ्यकर्मीलाई जोखिम भत्ता उपलब्ध गराउने भनेर जोखिम भत्ता व्यवस्थापन आदेश, २०७७ स्वीकृत गरेसँगै भूमेले पनि स्वास्थ्यकर्मीलाई जोखिम भत्ता उपलब्ध गराउने निर्णय गरेको हो । हाल गाउँपालिकामा ४७ स्वास्थ्यकर्मी कार्यरत रहेकामा २४ जना भूमेले निर्माण गरेको विभिन्न हेल्थ डेस्कमा खटिएका छन् । - रासस