काठमाडौं । गोदावरी नगरपालिकाको बडिखेलमा प्रवेश गर्ने सवारीसाधनहरु निर्मलीकृत गरेर मात्र प्रवेश गर्न पाउने भएका छन् । 

उक्त क्षेत्रमा चौध वटा भन्दा धेरै पानी फ्याक्ट्रीहरु छन् । 

कोरोनाका कारण अहिले देश नै बन्दाबन्दीको मारमा परेको छ । तर, गोदावरी नगरपालिका वडा नम्बर ४ बडिखेलमा भने पानी बोक्नका लागि दैनिक सयौंको संख्यामा गाडीहरु आवतजावत गर्छन् ।  

ती गाडीमार्फत् आफ्नो टोलमा कोरोना प्रवेश नगरोस् भनेर स्यानिटाइज गरेर मात्रै प्रवेश गर्न दिइएको वडा सदस्य कृष्ण  मुरारी घिमिरेले बताए । 

उनले भने, “बडिखेलभित्र दशवटा पानीका फ्याक्ट्रीहरु छन् । ती पानी फ्याक्ट्रीबाट दैनिक पचासवटा भन्दा बढी पानी बोक्ने गाडीहरु सहरको विभिन्न ठाउँहरु आवतजावत गर्छ । ती गाडीमार्फत् आफ्नो क्षेत्रमा कोरोना संक्रमण भित्रन सक्ने भएका कारण बडिखेल प्रवेश गर्ने सवारी साधनलाई स्यनिटाइज गरेर मात्र प्रवेश गर्ने वातावरण मिलाएका हौं ।”

वैशाख  ५ गते नगरपालिमा निर्णय गरेर त्यसै दिनदेखि गाडीहरुलाई स्यानिटाइज गरेर मात्र प्रवेश गर्न सुरु गराएको घिमिरेले बाह्रखरीलाई बताए ।

साथै बडिखेल क्षेत्रमा अपरिचित मानिसलाई प्रवेश गर्न समेत कडाइ गरिएको छ ।