नेपालका अस्पतालको क्षमता कम भएको अवस्थामा मौसमी फ्लुका बिरामीहरू कोरोना लागेको आशंकामा अस्पताल धाउन थालेपछि अस्पतालमा बिरामीको दबाब र बिरामीमा डरको मात्रा झन् बढेको देखिएको छ । कतिपय बिरामीलाई ज्वरो आएको अवस्थामा अस्पतालहरूले ढोकैबाट उपचार हुन नसक्ने भन्दै फर्काएको समाचारले पनि नेपाली मिडियामा स्थान पाएका छन् ।
गत साता मंगलवार नागरिक दैनिकमा प्रकाशित समाचारअनुसार शुक्रराज ट्रपिकल तथा सरुवा रोग अस्पतालमा साधारण समयभन्दा दोब्बर बढी मौसमी फ्लुका बिरामी जचाउन आएका छन् । पवित्रा सुनारले लेखेको सो समाचारअनुसार गएको हप्ता ४०० भन्दा बढी बिरामी रुघा, खोकी र ज्वरो आएको जचाउन टेकुमा रहेको सरुवारोग अस्पताल पुगेका र ति मध्ये आधाभन्दा बढीलाई कोरोना संक्रमणको डर देखिएको थियो । बुधबारको नागरिकमा सुनारले नै कोरोना परीक्षण गर्न साधनको अभाव भएको समाचार प्रकाशित गरिन् । समाचारअनुसार बिरामीको कफ जाँच्न चाहिने पीसीआर (पोलिस्मर चेन रिएक्सन) किट सरकारसँग एथेष्ट मात्रामा छैन । सो दिनसम्मको रिपोर्टअनुसार सरकारले दुई हजार जति किट ल्याएकोमा पाँच सय प्रयोग भइसकेको थियो । धेरै बिरामीले आफूलाई कोरोना संक्रमण भए–नभएको जाँच गराउन चाहे पनि तोकेको दायराभित्रका बिरामीको मात्र कोरोना भाइरस टेस्ट भएको पनि सो समाचारमा जनाइएको छ ।
नागरिक दैनिकले शनिवार एक समाचार प्रकाशित ग¥यो जसमा बुटवलका एक बिरामीलाई रुपन्देही, नवलपरासी र काठमाडौंका आधा दर्जन अस्पतालले भर्ना लिन नमानेको र अन्ततः प्रदेश पाँचका मुख्यमन्त्रीको दबाब पश्चात् लुम्बिनी प्रादेशिक अस्पतालले भर्ना लिएको लेखिएको छ ।
‘लक डाउन’
नेपालमा कोरोना संक्रमित बिरामी नभेटिए पनि सरकारले सम्पूर्ण देशलाई ‘लक डाउन’को अवस्थामा राखेर सकभर घरबाट बाहिर ननिस्कन सूचना जारी गरेको छ । चीनबाट सुरु भएको यो रोगले युरोप, अमेरिका र भारतमा पनि संक्रमणको गति बढाउँदै गएपछि नेपालले पनि यसलाई नियन्त्रणमा लिन विभिन्न उपाय अपनाएको छ । नेपालका दैनिक पत्रिकाले गएको साता कोरोना भाइरसका विषयमा भएका संसारभरका समाचार तथा नेपालले लिने कदमका बारेमा समाचार बनाए । गएको साताका दैनिक पत्रिकाले सरकारले लिएका कदमका बारेमा ठूलो विरोध गरेनन् । तर, मंगलवारको कान्तिपुरमा स्वरुप आचार्य तथा बुनु थारुले लेखेको समाचारमा सरकारले कोरोनाविरुद्ध थप निर्णय लिए पनि कार्यान्वयन फितलो भएको समाचार संप्रेषण भयो ।
अघिल्लो साताको आइतवार भारतका प्रधानमन्त्री नरेन्द्र मोदीले सार्क राष्ट्र प्रमुखहरूको भिडियो कन्फरेन्स आयोजना गरेर कोरोनाको संक्रमणविरुद्ध सार्क आपत्कालीन कोष खडा गर्ने विषयमा सबैको समर्थन जुटाए । सोमवारका नेपालका दैनिक पत्रिका सबैले सार्क राष्ट्रका सरकार प्रमुखहरूको भिडियो कन्फरेन्सको समाचारलाई प्राथमिकता दिए । नयाँ पत्रिकाले यस समाचारलाई प्रथम पृष्ठको तल्लो स्थान दियो भने अन्य सबै पत्रिकाले ब्यानर समाचार बनाए ।
प्रधानमन्त्री केपी शर्मा ओलीले शुक्रवार राष्ट्रको नाममा सम्बोधन गर्दै नेपाल आउने सम्पूर्ण अन्तर्राष्ट्रिय हवाई उडानमा चैत ९ देखि १८ सम्म प्रतिबन्ध लगाउने र अत्यावश्यकबाहेकका सम्पूर्ण सेवा बन्द गरिने घोषणा गरेका छन् । अत्यावश्यक सेवाबाहेक नागरिकलाई अन्य सेवा चैत २१ सम्मका लागि उपलब्ध नहुने भएको छ । त्यस्तै अदालतले पनि नागरिकका स्वतन्त्रताका बाहेक अन्य कुनै पनि मुद्दामा पेसी नतोक्ने निर्णय गरेको छ । प्रधानमन्त्रीको यो घोषणासँगै नेपालमा औपचारिकरुपमा ‘लक डाउन’ लागू गरिएको छ ।
नेपाली दैनिक पत्रिकाले आइतवारको पत्रिकामा सरकारले लगाएको प्रतिबन्धका विषयमा सम्पादकीय लेखेका छन् । नयाँ पत्रिकाले यसलाई सरकारको ‘कफ्र्यु’ भनेको छ तथापि यसलाई स्वाभाविकरुपमा लिनुपर्ने जनाएको छ । गोरखापत्रले यस कदमलाई सुरक्षाका लागि हातेमालो भनेको छ । नागरिक दैनिकले पनि सावधानी अपनाउनु र सरकारका निर्णय पालना गनुपर्ने धारणा सम्पादकीयमार्फत प्रकट गरेको छ । राजधानीले यस कार्यलाई साझा लडाइँका रुपमा हेरेको छ भने अन्नपूर्ण पोस्टले नागरिकलाई सुरक्षित भएर बसमात्र भनेर नपुग्ने र नागरिकलाई सुरक्षित महसुुुुस गराउनुपर्ने अवस्था देखिएको जनाएको छ । कान्तिपुरले हरेक नागरिकलाई जिम्मेवार हुन र प्रधानमन्त्रीले गरेको अनुरोधको पालना गर्न सचेत गराएको छ ।