काठमाडौं । तत्कालीन नेकपा एमाले र माओवादी केन्द्रबीच एकतापछि बनेको नेपाल कम्युनिष्ट पार्टी (ने क पा) ले बुधबार ‘जनयुद्ध’ दिवस मनाउने भएको छ ।

यद्यपि नेकपाले त्यसलाई औपचारिक रूपमा जनयुद्ध दिवस मनाउने भनेको छैन । “जनआन्दोलन तथा जनयुद्धका सहिदहरूको सम्झनामा फागुन १ गते पार्टीका प्रदेश र जिल्ला कार्यालयमा श्रद्धाञ्जली कार्यक्रम राखिएको छ,” पार्टी महासचिव विष्णु पौडेलले बाह्रखरीसँग भने ।

जनयुद्ध दिवसको सन्दर्भ पारेर आयोजना गरेको कार्यक्रममा प्रधानमन्त्री केपी शर्मा ओली भने उपस्थित नहुने कार्यालय सचिव कृष्णगोपाल श्रेष्ठले जानकारी दिए । गत वर्ष पनि पेरिसडाँडामा आयोजित कार्यक्रममा अध्यक्ष ओली अनुपस्थित थिए ।
“प्रधानमन्त्री ओली राष्ट्रियसभा गृहमा श्रम तथा रोजगार मन्त्रालयले आयोजना गरेको कार्यक्रममा सहभागी हुनु पर्ने भएकाले आउन नपाउने हुनुभयो,” उनले भने, “प्रचण्ड र महासचिव विष्णु पौडेल कार्यक्रमको मुख्य वक्ता हुनुहुनेछ ।
नेकपाको प्रदेशबाहेक जिल्ला कमिटी एकता नभइसकेकाले संयुक्त रूपमा कार्यक्रम राख्न निर्देशन दिएको नेकपाले जानकारी दिएको छ ।

सातै प्रदेश, जिल्ला कमिटी र भ्रातृ संगठनसमेतले जनयुद्धको सम्झनामा श्रद्धाञ्जली र विविध कार्यक्रम आयोजना गरेको नेकपाको भनाइ छ ।

अखिलले दीप प्रज्ज्वलन गर्ने
जनयुद्ध दिवसको सन्दर्भमा नेकपा निकट अनेरास्ववियु र अखिल क्रान्तिकारीले संयुक्त रूपमा बुधबार बिहान श्रद्धाञ्जली कार्यक्रम आयोजना गर्ने र साँझ माइतीघरमण्डलामा दीप प्रज्ज्वलनको कार्यक्रम आयोजना गर्ने भएको छन् ।

दुवै संगठनको सोमबार बसेको बैठकले फागुन १ गते जनयुद्ध र जनआन्दोलनमा सहादत प्राप्त गर्ने सहिदहरूको सम्झनामा  संयुक्त रूपमा श्रद्धाञ्जली कार्यक्रम गर्ने निर्णय गरेका छौँ,” अनेरास्ववियुकी अध्यक्ष नवीना लामाले बाह्रखरीसँग भनिन्, “१ गते केन्द्रका तर्फबाट साँझ माइतीघर मण्डलामा दीप प्रज्ज्वलन गर्छौं । देशभरका सबै जिल्ला कमिटी र क्याम्पसमा आफ्नो अनुकूल हुनेगरी संयुक्त कार्यक्रम गर्न पनि निर्देशन दिएका छौँ ।”

यसैबीच सरकारले १ फागुनकै दिन प्रधानमन्त्री स्वरोजगार कार्यक्रम घोषणाको तयारी गरेको छ । जनयुद्ध दिवसको सम्मानमा दुई पार्टीको एकता अझै बलियो छ भन्ने सन्देश प्रवाह गर्न जनयुद्ध दिवसकै दिन श्रम तथा रोजगार मन्त्रालयले प्रधानमन्त्री रोजगार कार्यक्रम घोषणा गर्न लागेको बताइएको छ ।

फाइल तस्बिर