काठमाडौं । प्रहरीले मोरङका विभिन्न स्थानबाट गरी २३४ किलो लागुऔषध गाँजा बरामद गरेको छ । गाँजासहित पाँचजनालाई पक्राउ गरेको छ ।
मोरङको रंगेली नगरपालिका–२, चेका खोलास्थित बाँसघारीबाट १५० किलो अवैध लागुऔषध गाँजासहित दुईजना पक्राउ परेका छन् ।
पक्राउ पर्नेहरूमा भारत अररिया ठिंगापुर पञ्चायत–६ कुवाडी बस्ने २९ वर्षीय दिपक झा र भारत अररिया हाँसा पञ्चायत बस्ने ३० वर्षीय सिन्टुककुमार सिंह रहेका छन् । उनीहरु गएराति पक्राउ परेका हुन् ।
प्रहरी चौकी अमाहिवरियाती र इलाका प्रहरी कार्यालय रंगेलीबाट खटिएको प्रहरीले उनीहरूलाई उक्त परिमाणको गाँजासहित फेला पारी पक्राउ गरेको हो ।
अनुसन्धानको क्रममा रंगेली नगरपालिका–३, रंजनी बस्ने ४६ वर्षीय वीरबहादुर कार्कीको घर नजिक रहेको बाँसघारीमा लुकाइ राखेको अवैध लागुऔषध गाँजा करिब ८४ किलो फेला पारी पारिएको छ ।
वीरबहादुर कार्की, भारत कुटहरा बस्ने २४ वर्षीय प्रविण पासवान र भारत कटापुर बस्ने २४ वर्षीय विष्णुकान्त मिश्रलाई प्रहरीले पक्राउ गरेको हो ।
