मेघेन्द्र प्रकाश गिरी 

मलाई माया गर्ने पूजनीय मेरा बा
हात समाएर मेरो उज्यालो भविष्य कोर्ने मेरा बा
बचपनदेखि जीवनभरको यात्रामा थाक्न नजान्ने
भित्र पीडा भए पनि मेरा सामु
मन्द मुस्कान छर्ने मेरा बा
कति दिन कति रात भोकै सुते होलान् मेरा बा
छोराको चाहना पूरा गर्न कति झुके होलान्
र कति बाचा दिए होलान्
मेरा लुगाफाटा, स्कुल फी, कापीकलमको जोहो गर्न
कति पसिना बगाए होलान्
म सम्झन्छु आज त्यो मोह कति हृदयस्पर्शी थियो
मेरो एउटा हाँसोका निम्ति
कति माइल हिँडे होलान् मेरा बा
बिनाशब्द, बिनागुनासो ।

देश सेवा निःस्वार्थ भावले गर्न सदैव अग्रसर हुने
मेरा बालाई म राम्रै चिन्छु
नेपाल आमालाई आफ्नै ममतामयी आमासरि
माया गर्ने मेरा प्यारा बा
राष्ट्रसेवामा समर्पित भएका
रत्तिभर लालचा नबोकेका मेरा बा ।

सालमा एक सरो लुगा र सादा जीवनमै
जिउन जानेका मेरा बा
भ्रष्टाचारी र राष्ट्रघातीलाई घृणा गर्ने मेरा बा
सदैव नेपाल आमा हाँसेको, सिँगारिएको,
खुसी भएको देख्न चाहने मेरा बा 
प्यारा, साधारण, मायालु र कोमल हृदयका
कसैलाई रत्तिभर बचन फर्काउन नजान्ने मेरा बा ।

मेरा बा, 
बा !
मेरा प्यारा बा !