काठमाडौं । अमेरिकाले चिनियाँ विद्यार्थीलाई अमेरिकामा कडाइ गर्ने घोषणा गरेको छ ।
 
अमेरिकी विदेशमन्त्री मार्को रुबियोले अमेरिकी सरकारको  चिनियाँ कम्युनिस्ट पार्टीसँग जोडिएका वा महत्वपूर्ण क्षेत्रमा अध्ययनरत विद्यार्थीलाई कडाइ गर्ने बताएको बीबीसीले जनाएको छ ।
 
अमेरिकामा यो नीतिको बारेमा बोल्दै उनले भने, “चीन र हङकङबाट आउने भविष्यका भिसा आवेदकहरूमा छानबिन गर्न  भिसा मापदण्डहरू पनि संशोधित गरिनेछ ।”

ट्रम्प प्रशासनले लगाएको आयात करको प्रतिक्रियास्वरूप दुई महाशक्ति राष्ट्रबीच व्यापार युद्ध सुरु भएपछि बेइजिङ र वासिङ्टनबीचको सम्बन्ध हालका महिनाहरूमा थप बिग्रिएको पृष्ठभूमिमा यो निर्णय आएको हो ।

सोमबार अमेरिकी विदेशमन्त्री रुबियोले विश्वभरका अमेरिकी दूतावासहरूलाई विद्यार्थी भिसा अन्तर्वार्ताको अपोइन्टमेन्ट रोक्न आदेश दिएका थिए । यो निर्णयको पछाडि विदेश मन्त्रालयले आवेदकहरूको सामाजिक संजाल परीक्षण विस्तार गर्ने योजना सम्बन्धी नयाँ तयारी रहेको बताइएको छ ।

गतवर्ष अमेरिकामा लगभग दुई लाख ८० हजार चिनियाँ विद्यार्थी अध्ययनरत थिए ।

“राष्ट्रपति ट्रम्पको नेतृत्वमा, अमेरिकी विदेश मन्त्रालयले गृह मन्त्रालयसँग मिलेर चिनियाँ विद्यार्थीको भिसा आक्रामक रूपमा रद्द गर्नेछ । यसमा चिनियाँ कम्युनिस्ट पार्टीसँग जोडिएका वा महत्वपूर्ण क्षेत्रमा अध्ययनरत विद्यार्थी पनि समावेश हुनेछन्,” रुबियोले बुधबार भने, “हामी चीन र हङकङबाट आउने सबै भिसा आवेदनहरूको छानबिन अगाडि बढाउन भिसा मापदण्डहरू पनि संशोधित गर्नेछौँ ।”

ट्रम्प प्रशासनले यसअघि नै धेरै विदेशी विद्यार्थीलाई घर फर्काउने कदम चालेको छ । यसअन्तर्गत हजारौँ भिसा रद्द गरिसकेको छ । यी कार्यहरूमध्ये धेरैमा अदालतहरूले रोक लगाएका छन् । बीबीसी