काठमाडौं । नेपाली कांग्रेसका उपसभापति पूर्णबहादुर खड्काले कांग्रेस देखिने गरी सरकारमा सहभागी रहेको बताएका छन् । पार्टी केन्द्रीय कार्यालय सानेपामा शुक्रबार आयोजित कार्यक्रमलाई सम्बोधन गर्दै उनले यस्तो बताएका हुन् ।

उनले कांग्रेस देखिने, बुझिने गरी सरकारमा उपस्थित रहेको उल्लेख गरे । अहिलेको एक किसिमको आवश्यकता, परिस्थिति, अहिलेको संसद्को संरचना विविध कारणले हामी अहिलेको सरकारमा सहभागी बनेको बताए । एउटा मिसन बनाएर मुलुकको संविधान संशोधनको संवैधानिक प्रावधानअनुसार त्यसलाई केन्द्रविन्दुमा राखेर अर्थतन्त्रको सुधार, आर्थिक प्रगतिको कुरा समेतलाई जोडेर आममतदाता, जनतामा सेवा प्रवाहलाई चुस्त दुरुस्त र प्रभावकारी बनाउने लगायतका विषयलाई जोडेर सरकारमा सहभागी रहेको बताए ।

"सरकारमा छ की छैन भन्ने प्रश्न कांग्रेसका मञ्चबाट गरिनु उपयुक्त हुन्न भन्ने मेरो स्पष्ट धारणा छ । हामी कांग्रेस हौँ । देखिने गरी सरकारमा छौँ । बुझिने गरी छौँ । अहिलेको परिस्थितिको एक किसिमको आवश्यकता, परिस्थिति, अहिलेको संसद्को संरचना विविध कारणले हामी अहिलेको सरकारमा सहभागी भएका छौँ," उनले भने ।